Каторы ўжо дзень стаіць спякота, сапраўдным паратункам ад якой, безумоўна, з’яўляецца купанне.
На жаль, купацца ў Дзятлаўскім раёне дазволена толькі ў двух месцах. Што ж рабіць?
Для наведвальнікаў летніка “Вясёлая планета” Дварэцкай сярэдняй школы было арганізавана сапраўднае свята купання. Школьнікі адправіліся на возера санаторыя “Радон”. Вось дзе было весела! Хлопчыкі купаліся, даставалі з вады ракушкі і палохалі імі дзяўчынак. А што ж рабілі дзяўчынкі? А яны таксама купаліся, рабілі выгляд, што палохаюцца – і дружна верашчалі ад смеху і радасці.
Любава Ляўшук, Паліна Аўсянік, Вікторыя Харошка, Вікторыя Сямашка, Паліна Каско і Паліна Лазарэнкава не стрымаліся і пачалі нават танцаваць у вадзе флэш-моб.
Не адбышлося і без нечаканасцяў: Ілья Макарэвіч злавіў замест ракушкі сапраўднага рака!
Пасля водных працэдур дзеці прагуляліся па тэрыторыі санаторыя, зрабілі сэлфі на фоне прыгожых краявідаў.
Гэта быў адзін з самых лепшых дзён у лагеры, які хочацца паўтарыць яшчэ раз.
Лідзія Жых,
выхавацель аздараўленчага летніка “Вясёлая планета” Дварэцкай сярэдняй школы
