Скандаліце? Вас правераць

З 15 снежня па 4 студзеня на тэрыторыі Дзятлаўскага раёна праводзяцца прафілактычныя мерапрыемствы ў адносінах да асобнай катэгорыі грамадзян. У гэты час супрацоўнікі аддзела ўнутраных спраў наведваюць асоб, не занятых у эканоміцы (непрацуючых); грамадзян, якія стаяць на прафілактычным уліку ў аддзеле аховы правапарадку і прафілактыкі за дамашняе насілле; якія вярнуліся з лячэбна-працоўнага прафілакторыя і не працуюць. Таксама пад кантролем жылыя памяшканні, якія знаходзяцца на ўліку як “прытон”, і асобы, за якімі ўстаноўлены прэвентыўны нагляд, асуджаныя да абмежавання волі без накіравання ў папраўчую ўстанову адкрытага тыпу.

У адзін з рэйдаў па горадзе Дзятлаве адправіліся ўчастковы інспектар міліцыі Віталій Грышук разам з членамі добраахвотнай дружыны Дзятлаўскага РУП ЖКГ. У планах было наведаць пяць адрасоў. З тымі, каго засталі дома, правялі прафілактычную гутарку аб неабходнасці весці законапаслухмяны лад жыцця, для непрацуючых патлумачылі парадак працаўладкавання.

– З такой катэгорыяй грамадзян заўжды няпроста, іх трэба трымаць на кантролі пастаянна, – адзначыў Віталій Іванавіч. – Асобы, якія стаяць на ўліку як сямейна-бытавыя скандалісты, на працягу года рэгулярна правяраюцца па месцы жыхарства, гутараць не толькі з імі, але і з іншымі членамі сям’і, каб выявіць, што ахвяры насілля не ўтойваюць агрэсію ў адносінах да сябе. Што тычыцца непрацуючых, то з імі таксама сітуацыя неадназначная: калі хтосьці з іх быў хаця б паўгода без работы і змог выжыць, ён працаваць ужо не будзе. Тым жа, хто жадае знайсці работу, мы заўжды дапамагаем, накіроўваем да спецыялістаў, якія прапануюць ім пэўную вакансію.

Святлана ГРЫШЫНА

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga