Семінар-вучоба. Аб’ектам гісторыка-культурнай спадчыны – асаблівая ўвага

У раённым выканаўчым камітэце пад кіраўніцтвам намесніка старшыні райвыканкама Вадзіма Бяляткі з удзелам начальніка аддзела жыллёва-камунальнай гаспадаркі, архітэктуры і будаўніцтва Алены Грамко і начальніка аддзела землеўпарадкавання райвыканкама Дзмітрыя Залеўскага прайшоў семінар-вучоба для ўласнікаў, карыстальнікаў і землекарыстальнікаў аб’ектаў гісторыка-культурнай спадчыны раёна.

Вадзім Бялятка акцэнтаваў увагу на тым, што неабходнасць дэталёва разабрацца ў патрабаваннях заканадаўства да ўтрымання такіх аб’ектаў узнікла пасля праверкі пракуратуры, у час якой выяўлены недахопы, унесена прадстаўленне.

З практычным аспектам у рабоце па забеспячэнні належнага рэжыму ўтрымання, выкарыстання, захавання гісторыка-культурных каштоўнасцяў у адпаведнасці з патрабаваннямі дзеючага заканадаўства прысутных азнаёміла, агучыла вострыя пытанні, вызначыла шляхі і тэрміны іх вырашэння загадчыца сектара культуры райвыканкама Таццяна Ваніслаўчык. Яна зазначыла, што на Дзятлаўшчыне знаходзяцца 37 аб’ектаў гісторыка-культурнай каштоўнасці (ГКК), за якімі замацаваны 19 уласнікаў-карыстальнікаў, большасць з якіх – гэта прадстаўнікі праваслаўнай і каталіцкай канфесій, а таксама Дзятлаўскае РУП ЖКГ, ДЛГУ “Дзятлаўскі лясгас”, ААТ “Дварэц-Агра”, Парэцкі, Данілавіцкі, Дварэцкі сельвыканкамы і новая ўласніца палаца Радзівілаў у Дзятлаве. Згодна з Кодэксам аб культуры, імі ў вызначаным парадку падпісаны ахоўныя абавязацельствы, якія вызначаюць індывідуальныя ўмовы ўтрымання і выкарыстання ГКК, устанаўліваюць парадак ажыццяўлення работ і іншыя абмежаванні дзейнасці ўласнікаў, а таксама патрабаванні па забеспячэнні іх захаванасці, якія рэгламентуюцца заканадаўствам. Разам з тым, як паказалі ўласныя маніторынгавыя мерапрыемствы і апошняя праверка пракуратуры Дзятлаўскага раёна, у дзейнасці ўтрымальнікаў ёсць шэраг парушэнняў. Яны тычацца ўстаноўкі ахоўных шыльдаў пэўнага ўзору, якія павінны быць на кожным з аб’ектаў; распрацоўкі праектаў зон аховы (ёсць толькі ў касцёла Унебаўзяцця Найсвяцейшай Панны Марыі ў Дзятлаве); пераводу земляў, дзе знаходзяцца ГКК, у катэгорыю земляў гісторыка-культурнага прызначэння; забеспячэння належнага рэжыму ўтрымання, выкарыстання, захаванасці аб’ектаў ГКК, падтрымання іх у належным стане, забеспячэння парадку на тэрыторыях. У сувязі з неабходнасцю вырашэння дадзеных задач і ўхілення парушэнняў канкрэтызаваны змест Плана па захаванні гісторыка-культурнай спадчыны Дзятлаўскага раёна, арганізаваны кантроль за яго выкананнем, выпрацаваны даручэнні для кожнага ўласніка-карыстальніка. У Комплекс мерапрыемстваў па ахове гісторыка-культурнай спадчыны Дзятлаўскага раёна на 2026-2030 гады ўнесены дапаўненні ў частцы разгляду пытанняў аб рабоце органаў мясцовага кіравання, арганіцацый і прадпрыемстваў раёна па захаванні гісторыка-культурнай спрадчыны, а падвесці вынікі гэтай работы мяркуецца на пасяджэнні райвыканкама ў першым квартале 2027 года.

Таццяна Ваніслаўчык таксама расказала, што прадстаўленне пракуратуры ў чэрвені было разгледжана на нарадзе з намеснікам старшыні райвыканкама Вадзімам Бяляткам, тады ж выпрацаваны комплекс мер, вызначаны канкрэтныя тэрміны іх выканання і арганізаваны за гэтым кантроль. З усімі патрабаваннямі яна азнаёміла ўдзельнікаў семінара-вучобы, падрабязна спыніўшыся на задачах і шляхах іх вырашэння.     

Як павінна ажыццяўляцца работа ўласнікаў з гісторыка-культурнымі каштоўнасцямі і метадычнае суправаджэнне, патлумачыла дырэктар Дзятлаўскага гісторыка-краязнаўчага музея Вераніка Паўлоўская. Увагу прысутных яна акцэнтавала на ўтрыманні аб’ектаў, асабліва эстэтычным і санітарным іх стане, своечасовым абкошванні травы на тэрыторыях, расказала аб працэдуры ўзгаднення правядзення рамонтных работ.

Падводзячы вынікі пасяджэння, Вадзім Бялятка заклікаў уласнікаў-карыстальнікаў аб’ектаў гістарычнай спадчыны раёна да выканання патрабаванняў заканадаўства і падкрэсліў, што пры неабходнасці яны могуць звяртацца па метадычную дапамогу да адказных спецыялістаў райвыканкама.

Ірына СТЫРНІК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga