Нядаўна ў Шчучыне ў праграме спартакіяды Гродзенскай вобласці сярод сельскіх жыхароў прайшлі спаборніцтвы па валейболе сярод дзяўчат 2002-2004 гадоў нараджэння. На ўдзел было заяўлена 13 раённых каманд.
Па выніках першых гульняў дзятлаўская каманда трапіла ў групу В, дзе гулялі таксама валейбалісты з Карэлічаў і Астраўца. Нашы спартсменкі атрымалі дзве перамогі, таму мелі магчымасць змагацца за прызавыя месцы.
Іх сапернікамі сталі Мастоўскі, Воранаўскі, Шчучынскі раёны.
Гульні за 1-4-е месца праводзіліся па кругавой сістэме. Першая гульня ў нашых валейбалістак была з прадстаўнікамі Воранава, і дзятлаўскія спартсменкі ўпэўнена атрымалі перамогу з лікам 2:0.
Наступная барацьба ў дзятлаўчанак была з сапернікамі са Шчучына. І ў гэтай гульні поспех аказаўся ў раёна, бітва скончылася з лікам 2:0.
У папярэдні раз пераможцамі спаборніцтваў былі Масты, і відавочна, што тая каманда зноў была настроена на перамогу. У першай партыі з дзятлаўскімі валейбалісткамі мінулыя чэмпіёны прайгралі з вялікім адрывам. Апошняя гульня для дзятлаўчанак была напружанай. Хваляванне адольвала, даводзілася нават браць тайм-аўт. Побач быў трэнер Васіль Русін, які падтрымліваў каманду «Каласок» і не дазваляў здавацца. Упартасць, вера ў сваю каманду і воля да перамогі – вось рэцэпт сапраўдных чэмпіёнаў. Менавіта гэта ўсё прынесла дзятлаўскаму «Каласку» першае месца ў абласным чэмпіянаце па валейболе і права прадстаўляць Гродзенскую вобласць на рэспубліканскіх спаборніцтвах.
Расказала пра «Каласок» і падзялілася ўражаннямі ад спаборніцтваў капітан каманды Таццяна Сцяцко:
– Прыкладна 5 гадоў я займаюся валейболам, а ў гэтай камандзе гуляю чацвёрты сезон. У нас моцныя ігракі. Што тычыцца мяне, то добра прымаю мяч, дастаткова моцны нападаючы ўдар. З дзяўчынкамі мы знаёмы даўно і заўсёды падтрымліваем адна адну. Калі хто-небудзь з ігракоў дапускае памылку, то кожны гатовы падстрахаваць. Любоў да валейбола нам прывіў наш трэнер Васіль Вячаслававіч, і без яго, думаю, наўрад ці б атрымалася перамога. Нягледзячы на тое, што хацелася перамагчы, было вельмі складана абагнаць сапернікаў.
Трэнер каманды-лідара Васіль Русін дзякуе камандзе валейбалістак за іх старанні, за выкананне ўсіх установак, якія ён даваў, за тое, што аддана наведвалі трэніроўкі і стараліся дамагацца спартыўных вышыняў. Таксама трэнер каманды «Каласок» выказвае падзяку бацькам валейбалістак і дырэктару гімназіі №1 горада Дзятлава Валерыю Ішуціну за садзейнічанне ў падрыхтоўцы да спаборніцтваў. Трэніроўкі ў дзяўчат праходзілі па вечарах, а ў склад каманды ўваходзяць жыхары раённых населеных пунктаў. Бацькі валейбалістак заўсёды падвозілі дачок да гімназіі, дзе ў спартыўнай зале трэніраваліся юныя спартсменкі.
Юлія БАКУНОВІЧ
