Ранішнік для адораных дзяцей (+відэа)

У Цэнтры культуры і народнай творчасці горада Дзятлава ў рамках акцыі “Нашы дзеці” прайшоў раённы навагодні ранішнік для адораных дзяцей.

У зале сабраліся самыя творчыя і паспяховыя навучэнцы, пераможцы і прызёры алімпіяд, даследчых праектаў, творчых конкурсаў і спартыўных спаборніцтваў.

Павіншаваць іх прыйшлі старшыня Дзятлаўскага раённага выканаўчага камітэта Андрэй Садоўскі, начальнік аддзела адукацыі райвыканкама Наталля Белаус, галоўны спецыяліст Алена Гарановіч.

Андрэй Садоўскі павіншаваў прысутных з надыходзячымі святамі. Падзякаваў моладзі Дзятлаўшчыны за тое, што яны сваімі дасягненнямі, перамогамі, актыўнай грамадзянскай пазіцыяй прадстаўляюць нашу малую радзіму, любімую Дзятлаўшчыну далёка за яе межамі.

Сустрэча праходзіла ў фармаце інтэрактыўнага цімбілдзінга “#ELKAЖЕЛАНИЙ ИЛИ#МЕЧТЫ#СБЫВАЮТСЯ#” яго задачамі было падвесці вынікі Года малой радзімы і 75-годдзя Вялікай Перамогі, прадэманстраваць дасягненні лепшых вучняў Дзятлаўшчыны. Для гэтага вядучыя праекта выбралі розныя формы — інтэрв’ю, віктарыны, відэапасланні, апытанні, гульні, флэш-моб.

 

Дзед Мароз і Снягурачка выказалі словы падзякі старшыні Дзятлаўскага раённага выканаўчага камітэта Андрэю Садоўскаму за аказаную дапамогу, праяўлены клопат і ўвагу, садзейнічанне ў падрыхтоўцы і правядзенні навагодняга дабрачыннага свята і правядзенні акцыі “Нашы дзеці”. На памяць гасцям яны ўручылі навагоднія сувеніры, а дзеці атрымалі традыцыйныя салодкія падарункі.

Да віншаванняў далучылася начальнік аддзела адукацыі райвыканкама Наталля Белаус, якая выказала ўпэўненасць, што наперадзе ў паспяховых юнакоў і дзяўчат – новыя гарызонты і пажадала, каб школьнікам заўсёды спадарожнічалі ўдача і старанне.

Вольга ЮШКЕВІЧ