Для 15 навучэнцаў Раготнаўскага дзіцячага сада-базавай школы канікулы пачаліся са змены ў летніку “Усмешка”, які працуе на базе ўстановы.
Хлопчыкаў і дзяўчынак на працягу 18 дзён знаходжання ў школьным летніку чакаюць цікавыя экскурсіі, спартыўныя мерапрыемствы, творчыя конкурсы, гульні на свежым паветры.
Кожны дзень наведвальнікі “Усмешкі” ажыццяўляюць завочныя падарожжы па нашай краіне разам з каларытным персанажам – прафесарам Адкрывашкіным і даведваюцца штосьці новае. У канцы кожнага дня на карту Беларусі наносіцца адзнака, дзе пабылі дзеці, што іх зацікавіла ў гэтым куточку роднага краю. За актыўны ўдзел у мерапрыемствах маленькія падарожнікі атрымліваюць па васільку – сімвалу беларускай зямлі.
Напрыканцы змены наведвальнікі “Усмешкі” завершаць сваё вялікае завочнае падарожжа, вынікам якога стане стварэнне фотакалажа “Мой край” у выглядзе карты Беларусі.
Алена КАНДРАШОНАК,
дырэктар летніка “Усмешка” Раготнаўскага дзіцячага сада-базавай школы
