Праект “Жамчужыны зямлі Дзятлаўскай”. Рукадзельніца, спявачка, цікавы суразмоўца

Спецыялісты сектара нестацыянарнага абслугоўвання насельніцтва раённага Цэнтра культуры і народнай творчасці павіншавалі з 80-гадовым юбілеем Гэлю Красоцкую, жыхарку вёскі Явар. Многія ў нашым раёне ведаюць гэту жанчыну як рукадзельніцу, самадзейную артыстку моўнага жанру, спявачку.

Родам яна з вёскі Старына, з небагатай сялянскай сям’і. Бацьку свайго не памятае, бо памёр, калі дзяўчынцы было пару гадкоў, матуля ж цяжка хварэла, таму на дзіцячыя плечы змалку лягло шмат работы. Дзяўчынка ўважліва назірала за вясковымі жанчынамі, іх паўсядзённымі клопатамі і справамі, стараючыся пераняць для сябе самыя карысныя ўменні. Калі суседкі збіраліся разам за рукадзеллем, ёй таксама было вельмі цікава глядзець, як вяжуць прыгожыя рэчы кручком ці ткуць яркія посцілкі. І сама пачала вывязваць розныя зубочкі і карункі.

Сёння хату Гэлі Браніславаўны ўпрыгожвае мноства рукатворных шэдэўраў. Расказвае, што ў яе нічога не прападае, кожны клубочак ідзе ў справу. Яна беражліва захоўвае свой першы вышыты ручнік, які аздобіла вязаным кручком “зубком” і вышываным крыжыкам узорам. Раней любіла вышываць гладдзю, пераважна ручнікі, матывы для якіх нярэдка пераймала ў іншых вясковых рукадзельніц.

Як сцвярджае Гэля Красоцкая, яе карысныя захапленні з дзяцінства дапамагаюць ёй дакрануцца да прыгожага, акунуцца ў свет творчасці, адпачыць ад працоўных будняў.  

У асабістай скарбонцы Гэлі Браніславаўны нямала ўзнагарод, пераважная большасць з якіх – за ўдзел у творчых конкурсах. Асабліва запамінальным для нашай зямлячкі было выступленне за раённую арганізацыю Беларускага таварыства інвалідаў па зроку на адным з абласных аглядаў-конкурсаў, дзе з жартоўнай песняй “Жонка мужа не любіла” сярод прадстаўнікоў розных раёнаў Гродзеншчыны Гэля Браніславаўна стала пераможцай.

Па стане здароўя ў апошнія гады жанчына ўжо не ўдзельнічае ў мастацкай самадзейнасці, але можа праспяваць шмат песень і расказаць цікавых баек. Яшчэ яна памятае рэцэпты хлеба, паўсядзённых вясковых страваў і прысмакаў, якія гаспадыні гатавалі на святы, ведае прыказкі і прымаўкі, прыкметы, па якіх прадказвалі надвор’е. Яе заўжды прыемна слухаць, можна даведацца шмат цікавага і карыснага.

Святлана ВЕНСКАЯ,
метадыст сектара нестацыянарнага абслугоўвання насельніцтва

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga      

#нашелучшее #нашалепшае #годбелорусскойженщины