Па тэме з аналітыкай. Хто з 1 ліпеня будзе атрымліваць дапамогі і пенсіі праз банк?

Тэма: З 1 ліпеня 2024 года мяняецца парадак атрымання дапамогаў на дзяцей і пенсій. Каго закрануць змяненні?

Слова спецыяліста

Ірына Баравік, намеснік начальніка ўпраўлення – начальнік аддзела пенсій і дапамогаў упраўлення па працы, занятасці і сацыяльнай абароне райвыканкама:

– У сувязі са змяненнямі ў заканадаўстве з 1 ліпеня пенсіянерам горада Дзятлава, якія не дасягнулі ўзросту 70 гадоў і не з’яўляюцца інвалідамі I або II груп, выплата пенсій будзе ажыццяўляцца праз банкі. Гэта ж тычыцца і сем’яў, зарэгістраваных у райцэнтры, якія гадуюць дзяцей і атрымліваюць дапамогі. Выключэнне складаюць атрымальнікі дзіцячых дапамогаў, якія самі маюць інваліднасць І або ІІ груп, і бацькі, якія выхоўваюць дзіця-інваліда І або ІІ груп да 18 гадоў. Ім даецца права выбару: атрымліваць дапамогу праз банк ці праз пошту.

Што рабіць?

Да 10 чэрвеня трэба выбраць банк, прыйсці туды асабіста з пашпартам і адкрыць там базавы рахунак, а таксама запоўніць заяву аб пералічэнні пенсіі або дапамогі. Яе ва ўпраўленне несці не трэба: перададуць работнікі банка.

Калі атрымальнік выплаты баіцца карыстацца карткай, то ён можа выбраць спосаб абслугоўвання праз банкаўскую касу, дзе кожны месяц будзе атрымліваць свае грошы.

Даведка

Новаўвядзенне не закране грамадзян з сельскай мясцовасці. Яно актуальнае для жыхароў горада Мінска, абласных і раённых цэнтраў, а ў нашым раёне – толькі для горада Дзятлава.

Лічбы

На Дзятлаўшчыне ўпраўленне па працы, занятасці і сацыяльнай абароне праз пошту ў фармаце афіцыйнага пісьма праінфармавана 187 жыхароў райцэнтра (менавіта столькі пенсіянераў і атрымальнікаў дзіцячых дапамогаў павінны звярнуцца ў банкі).

112 грамадзян ужо адкрылі базавыя рахункі і напісалі заявы. Астатнім неабходна гэта зрабіць да 10 чэрвеня 2024 года.

Дзе адкрыць рахунак?

ОАО “Сберегательный банк “Беларусбанк”,

ОАО “Приорбанк” ,

ОАО “Белагропромбанк”,

ОАО “Сбер Банк”,

ОАО “Белгазпромбанк”,

ОАО “Белорусский банк развития и реконструкции “Белинвестбанк”,

ОАО “Банк “Дабрабыт”,

ОАО “Белвнешэкономбанк”.

Важна

З 1 ліпеня 2024 года пенсія можа быць выплачана толькі праз банк!

Усе пенсіі і дзіцячыя дапамогі дзятлаўчанам у маі-чэрвені будуць выплачаны ранейшым спосабам. Выплаты праз банк пачнуцца толькі з ліпеня. Дата выплаты 5 чысло кожнага месяца.

Ірына СТЫРНІК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga