Урачыстасць пад такой назвай прайшла ў раённым Цэнтры культуры і народнай творчасці з нагоды Дня работнікаў сацыяльнай абароны.
У святочнай зале яна сабрала людзей адной з самых запатрабаваных прафесій, якія дораць цеплыню сваіх сэрцаў і паўсядзённы клопат тым, хто мае ў гэтым асаблівую патрэбу. На Дзятлаўшчыне ўшаноўвалі работнікаў Казлоўшчынскага сацыяльнага пансіяната “Колас”, упраўлення па працы, занятасці і сацыяльнай абароне райвыканкама, Цэнтра сацыяльнага абслугоўвання насельніцтва Дзятлаўскага раёна, ветэранаў галіны.
Яны прымалі віншаванні ад абласнога і раённага кіраўніцтва, калегаў, працоўных калектываў, грамадскіх аб’яднанняў, артыстаў раёна, вядучых Анастасіі Голуб і Чэслава Свіба.
– У Беларусі ўсё скіравана на тое, каб кожны чалавек ад нараджэння да глыбокай старасці быў максімальна абаронены дзяржавай, – звярнуўся да прысутных намеснік старшыні райвыканкама Вадзім Бялятка. – Сістэма сацыяльнай абароны Дзятлаўшчыны прадстаўлена вашымі арганізацыямі, у сферы працуе каля 300 работнікаў, ад якіх залежыць своечасовасць атрымання пенсій і дапамог, ільгот, якаснага сацыяльнага абслугоўвання. Пад надзейнай апекай супрацоўнікаў у пансіянаце “Колас” знаходзяцца 285 жыхароў, Цэнтр сацыяльнага абслугоўвання аказвае паслугі розных відаў больш за 1300 дзятлаўчанам, 7619 атрымальнікаў пенсій знаходзяцца на ўліку ва ўпраўленні па працы, занятасці і сацыяльнай абароне, для 366 чалавек, якія маюць патрэбу ў кругласутачным доглядзе, створаны камфортныя ўмовы пражывання і абслугоўвання, набліжаныя да дамашніх. Усебаковая шматгранная сістэма сацыяльнага забеспячэння запатрабавана жыццём, таму кіраўніцтвам раёна аказваецца важкая падтрымка для ўмацавання матэрыяльна-тэхнічнай базы ўстановаў. За 2024 год было патрачана больш за 33 тысячы рублёў, якія выкарыстаны на рамонт памяшканняў, набыццё тэхнікі і мэблі.
Паважаныя работнікі сацыяльнай абароны і ветэраны, дзякуем вам за няпростую працу, чуласць і ўвагу, жадаем здароўя, дабрабыту, новых працоўных дасягненняў. Няхай вашы клопат і адказнасць апраўдваюцца шчырай удзячнасцю вашых падапечных.
З нагоды свята Ганаровымі граматамі райвыканкама адзначаны начальнік упраўлення па працы, занятасці і сацыяльнай абароне райвыканкама Алена Васкель, сацыяльны работнік ЦСАН Дзятлаўскага раёна Святлана Трафімчык. Падзячнымі лістамі старшыні райвыканкама – сацыяльныя работніцы ЦСАН Дзятлаўскага раёна Алена Жыбко, Ірына Кашкала, Святлана Жых, Таццяна Турончык, Ірына Губко, Жанна Стральцова; галоўны спецыяліст упраўлення па працы, занятасці і сацыяльнай абароне райвыканкама Святлана Урбановіч; санітары Казлоўшчынскага сацыяльнага пансіяната “Колас” Наталля Бараноўская, Аляксандр Лішык, Наталля Сакалоўская, Наталля Хацкевіч, Марына Сакалоўская.
Сертыфікат ад старшыні раённага выканаўчага камітэта на набыццё веласіпедаў для сацыяльных работнікаў на суму шэсць тысяч рублёў быў уручаны дырэктару Цэнтра сацыяльнага абслугоўвання насельніцтва Дзятлаўскага раёна Таццяне Нікіпорчык.
– Прыемна ўшаноўваць людзей з вялікімі сэрцамі, адкрытымі душамі, – далучыўся да віншаванняў старшыня раённага Савета дэпутатаў Аляксандр Бараноўскі. – Вы дапамагаеце бяздольным пераадольваць цяжкасці, клапоціцеся – Дзякуй за вашу патрэбную і важную працу!
Аляксандр Бараноўскі ўручыў Ганаровую грамату раённага Савета дэпутатаў намесніку начальніка ўпраўлення – начальніку аддзела па працы і занятасці ўпраўлення па працы, занятасці і сацыяльнай абароне райвыканкама Таццяне Дорда. Падзячны ліст старшыні раённага Савета дэпутатаў – малодшай медсястры ЦСАН Дзятлаўскага раёна Але Кіслай.
– Так склалася, што ў першыя дні новага года мы віншуем работнікаў сацыяльнай абароны, і я ўпэўнена, што дабрачынная акцыя “Ад усёй душы”, якая трэці год запар крочыць па Беларусі, аб’ядноўвае неабыякавых людзей, – пераняла эстафету шчырых слоў намеснік старшыні камітэта – начальнік упраўлення арганізацыі сацыяльнай дапамогі камітэта па працы, занятасці і сацыяльнай абароне Гродзенскага аблвыканкама Аляксандра Гарачава. – Сапраўды, выпадковых людзей у нас няма. Персанальныя словы ўдзячнасці сёння адрасую кіраўнікам упраўлення па працы, занятасці і сацыяльнай абароне райвыканкама Алене Васкель, Цэнтра сацыяльнай абароны насельніцтва Дзятлаўскага раёна Таццяне Нікіпорчык, Казлоўшчынскага сацыяльнага пансіяната “Колас” Ігару Ціхану і калектывам. Дзякуй за вынікі вашай работы, яны сапраўды значныя і важкія. Няхай у вас будзе шмат сонечных дзён і ажыццяўляюцца добрыя мары.
Ганаровыя граматы камітэта па працы, занятасці і сацыяльнай абароне Гродзенскага аблвыканкама Аляксандра Гарачава ўручыла галоўнаму спецыялісту ўпраўлення Ірыне Кармільчык, загадчыку дапаможнай гаспадаркі пансіяната “Колас” Аляксандру Анісіму. Падзякі старшыні камітэта – санітаркам пансіяната Ірыне Губарэвіч і Марыі Рак, сацработніку сацыяльнага цэнтра Святлане Бакей.
У час свята каштоўныя падарункі раённых арганізацый ГА “Белая Русь” атрымалі Таццяна Гоман, Анжаліка Літвіненка, Таццяна Пышко, Марыя Клімонт, Вераніка Гірык, Алена Налівайка, Вольга Паўлоўская, “Беларускі саюз жанчын” – Марына Падгайская, Іна Петрукевіч, Ірына Баравік, а дзесяці ветэранам сферы ад раённай арганізацыі ГА “БСЖ” у падарунак аформлена падпіска на раённую газету “Перамога”.
Ад імя ветэранаў працы ўдзельнікаў мерапрыемства павіншавала Галіна Чура, якая ў свой час больш за два дзесяцігоддзі ўзначальвала раённы Фонд сацыяльнай абароны насельніцтва.
Святочны настрой, пранікнёныя песні і вясёлыя танцы людзям адной з самых гуманных прафесій у гэты дзень дарылі артысты, школьнікі, калегі і творчыя калектывы Дзятлаўшчыны.
Ірына СТЫРНІК
Фота Святланы ГРЫШЫНАЙ
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
