Навядзем парадак на будпляцоўках, альбо … штраф?

Па даручэнні Кіраўніка дзяржавы на Камітэт дзяржаўнага кантролю ўскладзены абавязкі па кантролі за работай прадпрыемстваў будаўнічай індустрыі.
Апроч правядзення кантрольна-аналітычных мерапрыемстваў у выглядзе праверак будаўнічых арганізацый, Камітэтам дзяржаўнага кантролю пастаянна ажыццяўляецца маніторынг непасрэдна будаўнічых пляцовак, на якіх і разгортваецца асноўная дзейнасць будаўнікоў,
Гэта форма кантролю ўжываецца для аператыўнай ацэнкі фактычнага стану аб’ектаў і ўмоваў дзейнасці суб’ектаў маніторынгу на прадмет адпаведнасці патрабаванням заканадаўства, выяўлення і прадухілення прычынаў і ўмоваў, якія спрыяюць парушэнням.
Як паказалі вынікі апошняга маніторынгу, праведзенага Камітэтам дзяржаўнага кантролю Гродзенскай вобласці ў ліпені бягучага года, сістэматычны характар носяць наступныя парушэнні патрабаванняў тэхнічных нарматыўных прававых актаў у галіне будаўнічай дзейнасці (ТКП 45-1.03-161-2009, ТКП 45-1.03-40-2006, ТКП 45-1.03-44-2006), абавязковых для выканання ўсімі ўдзельнікамі будаўніцтва:
— выкананне будаўніча-мантажных работ без наяўнасці зацверджанага праекту выканання работ;
— адсутнасць у даступным для агляду месцы пашпарта аб’екта або неадпаведнасць яго ўстаноўленым патрабаванням;
— адсутнасць высокай культуры будаўнічай вытворчасці і працы работнікаў;
— праходы да працоўных месцаў і на працоўных месцах не ўтрымліваюцца ў чысціні і парадку, не ачышчаюцца ад смецця;
— адсутнасць журнала выканання работ ці вядзенне яго з парушэннем устаноўленых патрабаванняў;
— месцы выканання работ на будаўнічай пляцоўцы не агароджаны ахоўнай агароджай з улікам патрабаванняў ГОСТ 23407-78.
Як правіла, самі будаўнікі лічаць вышэйназваныя парушэнні нязначнымі, але, тым не менш, паводле артыкула 21.3 Кодэкса Рэспублікі Беларусь аб адміністрацыйных правапарушэннях невыкананне або неналежнае выкананне абавязковых патрабаванняў тэхнічных нарматыўных прававых актаў у галіне будаўнічай дзейнасці пры будаўніцтве будынкаў і аб’ектаў інжынернай інфраструктуры вядзе да накладання штрафу як на фізічныя асобы, так і на юрыдычныя.
Па выніках апошняга маніторынгу накіраваны рэкамендацыі для ўхілення выяўленых парушэнняў на адрас 30 суб’ектаў гаспадарання. У выпадку ігнаравання дадзеных рэкамендацый альбо пры паўторы іх выяўлення з боку правяраючых будуць ужыты штрафныя санкцыі.
Камітэт дзяржкантролю Гродзенскай вобласці