Навучэнцы Дзятлаўшчыны выбіраюць

Напрыканцы лістапада на Дзятлаўшчыне прайшлі выбары дэпутатаў Моладзевага парламента пры Гродзенскім абласным Савеце дэпутатаў І сесіі ІV склікання.

Курыраваў раённую выбарчую кампанію Цэнтр творчасці дзяцей і моладзі горада Дзятлава.

Сярод кандыдатаў у дэпутаты Моладзевага парламента былі 10 навучэнцаў школ раёна, якія вызначыліся на акружных выбарах: Алена Ходар (Наваельнянская сярэдняя школа), Яўгенія Макарчук (Гезгалаўская сярэдняя школа), Вераніка Кашко (Дварэцкая сярэдняя школа), Алеся Верамейка (Круцілавіцкі дзіцячы сад-сярэдняя школа), Уладзімір Ківуля (Вензавецкі дзіцячы сад-сярэдняя школа), Лізавета Салата (сярэдняя школа №1 горада Дзятлава), Юлія Адамчык (сярэдняя школа №3 горада Дзятлава), Лізавета Панасюк (гімназія №1 горада Дзятлава), Андрэй Лішык (Казлоўшчынская сярэдняя школа), Кацярына Барысенка (Хвінявіцкі дзіцячы сад-сярэдняя школа).

На выбарчых участках ва ўстановах адукацыі адзначалася актыўная яўка жадаючых аддаць свой голас за кандыдата, праграма якога найбольш спадабалася. Напрыклад, навучэнец гімназіі №1 горада Дзятлава Дзмітрый Кулеш расказаў, чаго чакае ад дэпутатаў Моладзевага парламента, якія будуць прадстаўляць наш раён.

– Я прыйшоў на выбары, каб прагаласаваць за чалавека, які займаецца актыўнай грамадскай дзейнасцю і зможа ўнесці новыя цікавыя ідэі не толькі ў справы Дзятлаўшчыны, але вобласці ў цэлым. Мяркую, кандыдат, за якога я аддаў свой голас, калі будзе абраны, зможа на абласным узроўні актуалізаваць ініцыятывы маладых жыхароў нашага раёна па добраўпарадкаванні горада і населеных пунктаў, актывізаваць валанцёрскі рух, згуртаваць моладзь для абароны навакольнага асяроддзя. Мне вельмі хочацца, каб наша малая радзіма была яшчэ больш прыгожай і прывабнай для гасцей.

Па выніках галасавання перамогу на выбарах атрымалі Юлія Адамчык, Алена Ходар, Лізавета Салата. З мінулага года ў складзе парламента засталася дзятлаўская актывістка Наталля Крывулька. Пажадаем ім выканаць свае перадвыбарныя абяцанні і лепшыя спадзяванні юных жыхароў нашага раёна ў час работы Моладзевага парламента ІV Склікання.

Ірына КАЎКЕЛЬ