Налічэнні і разлік — на сваю карысць

У красавіку 2017 года следчымі органамі на падставе матэрыялаў праверкі фінансавай міліцыяй горада Слоніма ўзбуджана крымінальная справа па факце махлярства ў адносінах да кіраўніка (вядучага спецыяліста) аддзела аднаго з шырока вядомых універсамаў, размешчаных у горадзе. На працягу некалькіх месяцаў 2016 года ўказаны кіраўнік, маючы ў падначаленні некалькі работнікаў аддзела ўласнай вытворчасці, незаконна завалодала іх грашовымі сродкамі, атрыманымі ў якасці заработнай платы. Напрыклад, будучы прыцягнутай Слонімскім цэнтрам гігіены і эпідэміялогіі да штрафу ў суме больш за 3000000 недэнамінаваных рублёў за адміністрацыйны ўчынак, указаны вядучы спецыяліст вырашыла падзяліць віну (і адпаведна штраф) з падначаленымі, спецыяліст запэўніла, што налічыць ім павышаныя прэміі, частку якіх яны павінны будуць аддаць ёй. Так і адбывалася, прычым, як у перыяд выплаты штрафу, так і пазней. У выніку агульная сума сродкаў, незаконна канфіскаваных у падначаленых, перавысіла 9 млн. недэнамінаваных рублёў. Абураныя работнікі аддзела (у адной  з падначаленых шэф запатрабавала 4 млн. недэнамінаваных рублёў  з зарплаты) звярнуліся ў фінансавую міліцыю Слоніма. Высветлілася, што на самой справе работнікі аддзела павінны былі атрымліваць менавіта налічаныя ім сумы — ніякага «павышэння» іх прэмій не было. Цяпер следчым органам трэба ўглыбіцца ва ўсе налічэнні і разлікі на сваю карысць спецыяліста з універсама, а таксама даць прававую ацэнку яе дзеянням.

С. ТУПТАЛА,
начальнік Слонімскага МА УДФР КДК Рэспублікі Беларусь па Гродзенскай вобласці, падпалкоўнік фінансавай міліцыі