На прылаўку – арахіс з насякомымі

Усё часцей у буйных гандлёвых аб’ектах сталі з’яўляцца аддзелы або асобныя прылаўкі з разважнымі таварамі: арэшкамі, цукатамі, сушанай садавіной і многім іншым. Безумоўна, такія прадукты прыцягваюць увагу, бо пакупнік мяркуе, што яны ўтрымліваюць толькі карысныя бялкі, тлушчы і вугляводы, а таксама шэраг вітамінаў і мікраэлементаў.

Аднак у адным з магазінаў горада Дзятлава ў лютым пры правядзенні маніторынгу спецыялістамі Гродзенскай абласной інспекцыі Дзяржстандарту была выяўлена харчовая прадукцыя (арахіс смажаны вагавы некалькіх відаў і арэх кеш’ю смажаны вагавы), якая не адпавядае патрабаванням ТР МС 021/2011 “Аб бяспецы харчовай прадукцыі” і Закона Рэспублікі Беларусь “Аб якасці і бяспецы харчовай сыравіны і харчовых прадуктаў для жыцця і здароўя чалавека” па бяспецы.

Мала таго, што арахіс смажаны салёны знаходзіўся ў рэалізацыі пасля заканчэння тэрміну прыдатнасці, у дадатак арэх кеш’ю смажаны рэалізоўваўся з наяўнасцю жывых лічынак і кукалак насякомых. У выніку жыццядзейнасці лічынак насякомых у прадукце застаецца шмат мёртвых лічынак і скурак. Прадукт становіцца небяспечным, бо насякомыя могуць стаць прычынай інфекцыйных захворванняў.

У дачыненні да гэтай прадукцыі спецыялістамі інспекцыі былі прыняты меры ў адпаведнасці з заканадаўствам Рэспублікі Беларусь.

Як жа правільна выбраць такую прадукцыю і на што варта звяртаць увагу спажыўцу? Вельмі часта дадзены тавар рэалізуецца на вагу або фасуецца ў пакеты. У выпадку куплі ўжо расфасаванага тавару непасрэдна на ўпакоўцы або на этыкетцы абавязкова павінны быць указаны: назва харчовай прадукцыі, дата яе вырабу, тэрмін яе прыдатнасці і ўмовы захоўвання. Купляючы арэхі на вагу, ніхто не застрахаваны ад таго, што вам прададуць заляжалы або сапсаваны тавар. Таму не варта забываць аб дбайным візуальным аглядзе. Напрыклад, пры выбары арэхаў звярніце ўвагу на тое, каб на іх не было цвілі і плямаў, колер павінен быць раўнамерны, пах адпаведны. Наяўнасць цвілі сведчыць аб небяспечных рэчывах – афлатаксінах, якія могуць выклікаць цяжкія атручванні арганізма. Старайцеся купляць суцэльныя арэхі, а не арэхі ў здробненым або молатым выглядзе. Тэрмін прыдатнасці ў здробненых арэхавых ядраў рэзка скарачаецца, і прадукт хутка псуецца. Калі ў вас ёсць магчымасць выбіраць паміж ачышчанымі арэхамі і арэхамі ў шкарлупіне, аддайце перавагу апошнім. Пры куплі ачышчаных арэхаў, аглядзіце іх ядро – яно павінна быць добрага колеру, суцэльным і не зморшчаным.

Гродзенская абласная інспекцыя Дзяржстандарту