На Дзятлаўшчыне адкрыўся абласны турзлёт працоўнай моладзі (фота)

Абласны турысцкі злёт, прысвечаны Году культуры, пад эгідай Беларускага рэспубліканскага саюза моладзі праходзіць ва ўрочышчы Рыбакі на Дзятлаўшчыне. Удзел у злёце бяруць 17 каманд з раёнаў Гродзенскай вобласці і горада Гродна.

7 ліпеня адбылося ўрачыстае адкрыццё мерапрыемства. Ад гаспадароў зямлі, якая трэці год запар прымае абласны турысці злёт, гасцей з усіх рэгіёнаў Гродзеншчыны, прысутных павітаў старшыня Дзятлаўскага райвыканкама Аляксандр Дубовік. Ён пажадаў турыстам удачы на этапах спаборніцтваў і добрага баўлення часу, запрасіў бываць на Дзятлаўшчыне часцей.

Галоўны спецыяліст галоўнага ўпраўлення ідэалагічнай работы, культуры і па справах моладзі Гродзенскага аблвыканкама Іван Калбаска адрасаваў моладзі Гродзеншчыны пажаданні цікавых спаборніцтваў, таварыскага духу і добрага надвор’я.

«У абласным турысцкім злёце за тры дні спаборніцтва абавязкова вызначыцца пераможца, без гэтага ніяк. Аднак я ўпэнены, што тых, хто прайграў, на турзлёце не будзе, — дадаў ён.

Да агучаных пажаданняў далучылася першы сакратар Гродзенскага абласнога камітэта Беларускага рэспубліканкага саюза моладзі Эліна Брага. Яна расказала пра мноства праектаў, у якіх моладзь Гродзеншчыны ўдзельнічае ў Год культуры. Яна адзначыла, што, па словах кіраўніка дзяржавы, здаровы лад жыцця з’яўляецца адным з прыярытэтаў.

Галоўны рэдактар газеты «Гродзенская праўда» Павел Сухарукаў, які не першы раз з’яўляецца госцем абласнога турысцкага злёту на Дзятлаўшчыне, адрасаваў свае пажаданні камандам удзельніцам мерапрыемства. Ён згадаў сваё турысцкае юнацтва і выказаў радасць з той нагоды, што моладзь працягвае добрыя традыцыі здаровага ладу жыцця.

Пасля прадстаўлення каманд-удзельніц абласнога турысцкага злёту працоўнай моладзі Гродзеншчыны і іх капітанаў права падняць дзяржаўны сцяг Рэспублікі Беларусь было прадастаўлена пераможцы мінулагодніх спаборніцтваў — капітану каманды-прадстаўніцы Дзятлаўскага раёна СВК «Хвінявічы».

Сваё майстэрства валодання мячом прадэманстравалі юныя футбалісты — выхаванцы дзіцяча-юнацкай спартыўнай школы горада Дзятлава. Ад моладзі Гродзеншчыны Эліна Брага ўручыла ім у падарунак футбольныя мячы.

Фота Н. Авярчук