Міжнародны турзлёт чыгуначнікаў у Наваельні: другі дзень (фотарэпартаж)

Баранавіцкія турысты-чыгуначнікі пасля некалькіх відаў спаборніцтваў упэўнена трымаюцца на лідарскай пазіцыі. Яны – першыя ў шматбор’і, дартсе, трэція – у велагонцы.
А вось самымі крэатыўнымі ў прэзентацыі свайго палатачнага лагера аказалася каманда “Волат” (інфармацыйна-разліковы цэнтр БЧ). Журы давялося вытрымаць некалькі выпрабаванняў, перш чым суддзяў пасвяцілі “ў піраты”. Сваю абарону палатачнага гарадка волатаўцы ператварылі ў тэатральную дзею.
Літоўцы зачаравалі журы гасціннасцю. Частавалі хлебам, салам, сырам, нацыянальным прысмакам “Банкухінасам”.
— Хоць нашы поспехі сціплыя, — зазначае прафсаюзны лідар з Шаўляя Зянонас Рудайціс, — затое ўдзельнічаем ва ўсім і стабільна.
З Літвы прыехала каманда 22 чалавекі. Нараканняў на быт, надвор’е і арганізацыю турзлёту няма. У літоўскім лагеры – музыка, настрой, гасціннасць.
— У Лідзе мне давялося служыць за савецкім часам, — расказаў Зянонас. – Не быў у тых мясцінах з 70-х гадоў. Вельмі хачу з’ездзіць у Мінойты і Ліду. А ўвогуле я рады сустрэчы з калегамі-чыгуначнікамі, рад сустрэчы з Беларуссю. Нам тут камфортна і цікава.
Сапраўды цікавым і відовішчным аказаўся заплыў “на абы-чым”, у якім удзельнічалі 7 каманд. Для плавання абралі розныя дапаможныя сродкі: бочкі, пластыкавыя бутэлькі, балоны, пенапласт. Самыя хуткія аказаліся мінчане. На другім месцы прыплылі прадстаўнікі Віцебска, а на трэцім – Брэста.
Міжнародны турзлёт у Наваельні доўжыцца.

Трэці дзень турзлёту – развітальны. Пераадолены перашколы на турысцкай паласе, згуляны фінальныя матчы – футбольныя і валейбольныя. Суддзі падвялі вынікі. Нечаканасцяў у змаганні за перамогу не здарылася. Лідары сталі пераможцамі. Баранавіцкае аддзяленне Беларускай чыгункі стала пераможцай турзлёту. Каманда заахвочана паездкай у Сочы на міжнародныя гульні “Спорт пакаленняў”. Леташнія пераможцы – магіляўчане занялі другое месца, мінчане – трэцяе.

І. ІВАНАВА

Фота Б. ВАРНЫ