Аб устанаўленні і парадку павышэння мінімальнай заработнай платы расказала намеснік начальніка ўпраўлення па працы, занятасці і сацыяльнай абароне Дзятлаўскага райвыканкама – начальнік аддзела па працы і занятасці насельніцтва Святлана Волкава.
– Кім і на падставе чаго ўстанаўліваюцца памеры аплаты працы і дадатковыя выплаты работнікам?
– Частка 1 артыкула 63 Працоўнага кодэкса Рэспублікі Беларусь (далей – ПК) вызначае, што формы, сістэмы і памеры аплаты працы работнікаў, у тым ліку і дадатковыя выплаты стымулюючага і кампенсавальнага характару, устанаўліваюцца наймальнікам на падставе калектыўнага дагавора, пагаднення i працоўнага дагавора. Пры гэтым згодна з пунктам 4 часткі 1 артыкула 55 ПК наймальнік абавязаны выдаваць заработную плату ў тэрміны і памерах, устаноўленых заканадаўствам, калектыўным дагаворам, пагадненнем або працоўным дагаворам.
– Які цяпер устаноўлены памер мінімальнай заработнай платы?
– У адпаведнасці з часткай 1 артыкула 59 ПК, артыкула 1 Закона Рэспублікі Беларусь “Аб устанаўленні і парадку павышэння мінімальнай заработнай платы” (далей – Закон) мінімальная заработная плата (месячная і гадзінная) – гэта дзяржаўны мінімальны сацыяльны стандарт у галіне аплаты працы, які наймальнік абавязаны выкарыстоўваць у якасці ніжэйшай мяжы аплаты працы работнікаў за працу ў нармальных умовах на працягу нармальнай працягласці працоўнага часу пры выкананні абавязкаў работніка, якія вынікаюць з заканадаўства, лакальных нарматыўных прававых актаў і працоўнага дагавора.
Пастановай Савета Міністраў Рэспублікі Беларусь ад 28 снежня 2017 года №1022 “Аб устанаўленні памеру месячнай мінімальнай заработнай платы” ўстаноўлена месячная мінімальная заработная плата ў памеры 305 рублёў.
– Пры якіх умовах у працоўны стаж залічваюцца перыяды работы?
– Паводле часткі 1 артыкула 51 Закона Рэспублікі Беларусь “Аб пенсійным забеспячэнні” ў стаж працы залічваюцца перыяды работы, прадпрымальніцкай, творчай і іншай дзейнасці пры ўмове, што на працягу гэтых перыядаў ажыццяўлялася выплата абавязковых страхавых узносаў згодна з заканадаўствам аб дзяржаўным сацыяльным страхаванні. Прычым, калі сярэднямесячны фактычны заробак (даход), з якога выплачаны абавязковыя страхавыя ўзносы, за каляндарны год стаў ніжэйшы мінімальную заработную плату, устаноўленую заканадаўствам, названыя перыяды залічваюцца ў стаж працы з выкарыстаннем паправачнага каэфіцыента. Ён разлічваецца шляхам дзялення сярэднямесячнага фактычнага заробку (даходу) асобы на сярэднеарыфметычную велічыню мінімальнай заработнай платы за адпаведны перыяд выплаты абавязковых страхавых узносаў.
Па пытаннях аплаты працы і выканання заканадаўства аб працы звяртайцеся ва ўпраўленне па працы, занятасці і сацыяльнай абароне Дзятлаўскага райвыканкама па тэлефоне 2-63-82.
Таццяна ГРЫЦУК
