Масавае атручэнне дзяцей у Гродзенскім раёне: 35 школьнікаў шпіталізаваны

Школьнікі з Гродзенскага раёна шпіталізаваны 11 лютага з сімптомамі атручэння невядомай этыялогіі, паведаміў карэспандэнту БЕЛТА начальнік упраўлення аховы здароўя Гродзенскага аблвыканкама Андрэй Стрыжак.

У бальніцы знаходзяцца 35 дзяцей. Іх жыццю нічога не пагражае.

11 лютага каля 12.30 дзяжурны фельчар хуткай медыцынскай дапамогі паведаміў у службу 101 аб масавым паступленні дзяцей з прыкметамі атручэння. На месца здарэння былі накіраваны медыкі і ратавальнікі-хімікі на аўтамабілі хімічнай і радыяцыйнай абароны. Таксама прыцягнуты спецыялісты газавай службы Гродна і абласнога цэнтра гігіены, эпідэміялогіі і грамадскага здароўя.

Высветлілася, што ў дзяцей, якія займаліся на другім паверсе школы, адбылося рэзкае пагаршэнне здароўя (галавакружэнне, ірвота, павышэнне тэмпературы цела і артэрыяльнага ціску). Праведзеныя замеры паветра на колькасць шэрага хімічных рэчываў паказалі, што небяспечнай канцэнтрацыі няма, радыяцыйны фон не перавышаны. Цэнтр гігіены, эпідэміялогіі і грамадскага здароўя таксама праводзіць замеры на наяўнасць шкодных рэчываў, вынікі якіх будуць вядомы пазней.

Усе, хто звярнуўся па дапамогу, дастаўлены ў Гродзенскую абласную дзіцячую клінічную бальніцу. Вучэбны працэс часова прыпынены. Бацькі праінфармаваны аб неабходнасці кантраляваць стан сваіх дзяцей і неадкладна звяртацца ў выпадку пагаршэння здароўя ў медыцынскія ўстановы. У бальніцы псіхалагічную дапамогу тым, хто звярнуўся па яе, аказвае псіхолаг МНС.