Чым займаюцца спецыялісты Беларускага таварыства паляўнічых і рыбаловаў (БТПР) у летні перыяд, расказаў вядучы паляўніцтвазнавец Дзятлаўскай паляўнічай гаспадаркі Слонімскай міжраённай арганізацыйнай структуры Юрый Міклаш.
Праца круглы год
Як адзначыў Юрый Мікалаевіч, работа ў гаспадарцы фактычна не залежыць ад сезона. Асноўныя напрамкі – гэта ахова ўгоддзяў і рэгуляванне колькасці дзікіх жывёл. Іх падкормка вядзецца, калі гэтага патрабуюць умовы надвор’я, а мінеральная ў выглядзе солі – круглы год. Улетку асноўны ўхіл на ахове ўгоддзяў і раскладванні мінеральных кармоў.
Ахова ўгоддзяў і рэйдавыя мерапрыемствы
Яна вядзецца сіламі самой гаспадаркі і сумесна з кантралюючымі органамі.
– Любое знаходжанне штатнага работніка ў паляўнічых угоддзях – гэта рэйдавыя мерапрыемствы па іх ахове. Праводзяцца і сумесныя рэйды з Дзяржаўнай інспекцыяй аховы жывёльнага і расліннага свету пры Прэзідэнце Рэспублікі Беларусь. Як правіла, у інспекцый зацверджаны графікі, якія вызначаюць колькасць сумесных выездаў у месяц ці квартал. Яны арганізуюцца і па ініцыятыве гаспадаркі, у тым ліку разам з лясгасам, – патлумачыў Юрый Міклаш. – Пільная ўвага надаецца санітарнай бяспецы: вакол свінагадоўчага комплексу штотыднёва правяраецца, ці не прыходзілі дзікія кабаны. Гэта неабходна для своечасовага прыняцця мер па недапушчэнні інфіцыравання афрыканскай чумой свіней.
Будаўніцтва і рамонт аб’ектаў
Летам спецыялісты займаюцца таксама будаўніцтвам біятэхнічных комплексаў, што ўключае ў сябе абсталяванне падкормачных пляцовак – салонцаў, кармушак для аленя высакароднага, казулі, лані. Узводзяцца вышкі для назірання за дзікімі жывёламі, ажыццяўляецца рамонт збудаванняў, што прыйшлі ў непрыдатнасць, на тэрыторыі ўгоддзяў наводзіцца парадак.
Паляўнічы сезон
Цёплы сезон адметны паляваннем на трафейнага самца казулі (з 15 мая па 30 верасня). У пачатку ліпеня стартуе летне-восеньскі сезон здабычы бакаса, які доўжыцца да другой суботы жніўня. Адразу за ім і па другую нядзелю снежня дазволена паляванне на вадаплаўную і балотную дзічыну. Рэгуляванне колькасці вядзецца як сярод нармаваных відаў, так і сярод драпежных. За 2025 год ва ўгоддзях было здабыта 476 лісіц, 33 янотападобныя сабакі, 6 ваўкоў, 117 кабаноў, 84 алені высакародныя, 37 ласёў.
Такім чынам, летні перыяд у паляўнічай гаспадарцы – гэта не міжсезонне, а паўнавартасны працоўны этап. З надыходам халадоў да гэтага пераліку дадасца падкормка дзікіх жывёл, якая таксама патрабуе значных намаганняў і рэсурсаў. У цэлым, работа спецыялістаў БТПР на працягу года не спыняецца, а толькі карэктуецца ў залежнасці ад сезона і ўмоваў надвор’я.
Ксенія МІКЛАШ
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#нашелучшее #нашалепшае
