На базе Дварэцкай сярэдняй школы працуе палатачны выхаваўча-аздараўленчы летнік з кругласутачным знаходжаннем “Юныя турысты”. Кожная раніца тут пачынаецца з зарадкі, каб выхаванцы маглі атрымаць зарад бадзёрасці на цэлы дзень. Арганізаваны штодзённыя мерапрыемствы: паходы і экскурсіі, сустрэчы з мясцовымі майстрамі, майстар-класы, прагляд фільмаў ваенна-патрыятычнай накіраванасці. Дзеці наведалі Лаўрышаўскі манастыр, школьны музей, помнікі воінам, якія загінулі падчас Вялікай Айчыннай вайны ў гарпасёлку Наваельня, прынялі ўдзел у майстар-класе па стральбе, у пляценні з лазы.
У адзін з дзён яны пабывалі на экскурсіі ў вёсцы Стараельня на аграсядзібе “Мёд Панацэя”, дзе разводзяць пчол. Гаспадар расказаў хлопчыкам і дзяўчынкам пра асаблівасці сваёй аграсядзібы, а таксама пра ўсе прамудрасці мядовай справы. Дзяцей зацікавіў невялікі драўляны домік рэлаксу, дзе можна прайсці “вульевую тэрапію”. Унутры размешчаны два спальныя месцы, пад кожным знаходзяцца пчолы, якія сваім гудзеннем і вылучаемымі імі спецыяльнымі рэчывамі аказваюць лячэбны эфект на наведвальнікаў. Для эфектыўнасці тэрапіі трэба правесці ў доміку адну-дзве гадзіны на працягу пяці-шасці дзён.
Завяршыла экскурсію дэгустацыя мёду з чаяваннем.
Падрыхтавала да друку Таццяна САНЮК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
