1 чэрвеня прайшоў заключны этап рэспубліканскай акцыі “Не пакідайце дзяцей адных!”.
Дзятлаўскі раённы аддзел па надзвычайных сітуацыях праводзіў яе сумесна з работнікамі раённага цэнтра культуры і народнай творчасці, раённай арганізацыяй таварыства ратавання на водах, раённым аб’яднаннем Беларускага добраахвотнага пажарнага таварыства, прадстаўніцтвам “Белдзяржстрах”.
Самым актыўным удзельнікам мерапрыемства сталі вучні СШ №1 г. Дзятлава.
На свяце дзяцей сустракалі роставыя лялькі Філька і Лілька — персанажы часопіса “Юны ратаўнік”. Яны раздавалі паветраныя шары і наклейкі з малюнкамі аб мерах пажарнай бяспекі.
Вёў праграму клоун Клёпа. Гледачам было прапанавана прадстаўленне дзіцячай цыркавой студыі “Марсі”. Прадоўжылі праграму “Вясёлыя прыгоды Фількі і Лількі”. Яе персанажы ў гульнёвай форме расказалі дзецям пра меры пажарнай бяспекі.
Іх патлумачыў інспектар Дзятлаўскага РАНС. Таксама ён паведаміў аб прафілактычных мерапрыемствах, якія чакаюць дзяцей летам.
У час праграмы самыя актыўныя хлопчыкі і дзяўчынкі змаглі таксама паўдзельнічаць у конкурсах “Збор і выезд па трывозе”, “Юны ратаўнік”, “Знайсці пацярпелага”.
Завяршыла свята паказальнае выступленне ратаўнікоў Дзятлаўскага РАНС. На пляцоўцы каля Дома культуры ўсім удзельнікам акцыі былі паказаны пажарная аварыйна- ратавальная тэхніка, абсталяванне і інвентар.
З дзецьмі, якія адпачываюць у аздараўленчых летніках, ратаўнікі таксама сустрэнуцца ў час акцыі “Канікулы без дыму і агню”. У рамках мерапрыемства дзецям пакажуць тэматычныя відэастужкі, правядуць віктарыны і конкурсы.
МЕСЯЧНІК БЯСПЕКІ
З 1 чэрвеня па 1 ліпеня на тэрыторыі Гродзенскай вобласці праходзіць месячнік бяспекі жыццядзейнасці, насельніцтва, прафілактыкі правапарушэнняў.
Мэта мерапрыемства — зніжэнне колькасці правапарушэнняў, умацаванне правапарадку, папярэджанне парушэнняў, якія ўчыняюць у стане алкагольнага ап’янення.
Прашу ўсіх грамадзян падключыцца да правядзення мерапрыемства, не заставацца ўбаку. Аб выпадках парушэнняў правілаў пажарнай бяспекі і іншых правапарушэннях мы можаце паведамляць па тэлефонах “101”, “102” або “112”. Ананімнасць званкоў гарантуецца.
А. БЕЛЕНКА,
інспектар Дзятлаўскага РАНС
