Зусім няшмат засталося, і новы 2021 год уступіць у свае правы.
Вір святочных клопатаў кружыць нас у вясёлай каруселі, падымаючы ўсё вышэй і вышэй, бліжэй і бліжэй да паўночы, калі пачнецца сапраўднае чараўніцтва і кожны з нас з трапятаннем будзе загадваць свае самыя патаемныя жаданні, верачы, што яны абавязкова здзейсняцца.
У гэтыя апошнія дні адыходзячага года кожны з нас, напэўна, задумаецца, як прайшоў гэты год, якіх поспехаў дасягнуў, ці споўніліся яго жаданні.
Нягледзячы на ўсе цяжкасці 2020 года, якія адбываліся ў свеце і краіне, мы працягвалі жыць. У сем’ях нараджаліся дзеці, людзі жаніліся, адзначалі юбілеі, магчыма, не так, як хацелася б, але наша жыццё працягвалася і было шмат чаго добрага. Выпрабаванні, якія выпалі на нашу долю, я думаю, шмат чаму нас навучылі, мы вынеслі з іх пэўныя ўрокі.
Але кожны новы год мы пачынаем, як быццам з чыстага ліста, пакідаючы ў мінулым усе няўдачы, крыўды, страхі і, вядома ж, верым, што ў новым годзе ўсё будзе па-іншаму.
У навагоднюю ноч, як па ўзмаху чароўнай палачкі, усе людзі становяцца як быццам бліжэйшымі і раднейшымі адзін аднаму, усіх аб’ядноўвае адзінства сустрэчы любімага свята, адзінства жаданняў, што ўсё будзе добра, агульная весялосць, радасць і надзея. Так і хочацца сказаць: вось так бы заўсёды! У любы дзень і месяц года, і ў будні, і ў святы разам, са шчырай размовай, з прапанаванай рукой дапамогі, з дружнай кампаніяй, якой усе нягоды па плячы.
Не будзем губляць каштоўны час адыходзячага года, скажам тыя словы, якіх ад нас чакаюць, зробім так, каб побач з намі не было пакрыўджаных і абдзеленых увагай, сагрэем сваім клопатам і любоўю тых, хто ў гэтым мае патрэбу, падыдзем да сустрэчы новага года з чыстай душой і сэрцам.
Няхай навагодняя ноч створыць для ўсіх адчуванне поўнай гармоніі, ёлка і мандарыны зачаруюць незвычайным водарам свята, а цёплыя віншаванні родных, блізкіх і сяброў стануць добрым трамплінам да поспехаў 2021 года.
Захаваем у сваёй памяці ўсё добрае, што было ў 2020 годзе, і загадаем, каб 2021 год прынёс нам здароўе, пазбавіў ад няўдач і цяжкасцяў, даў магчымасць рэалізаваць свае мары і стаць кожнаму чалавеку больш шчаслівым. Бо шчаслівы чалавек абавязкова падзеліцца шчасцем з іншым.
Наталля КАЛОДКА
