Калі гіне культура, гіне і народ

18 кастрычніка ў раёне прайшоў Адзіны дзень інфармавання насельніцтва. Яго тэмы: “Традыцыі беларускага народа: шлях праз стагоддзі.

Захаванне і развіццё нацыянальнай культуры ў Рэспубліцы Беларусь”; “Дыспансэрызацыя як метад ранняга выяўлення захворванняў, зніжэння ўзроўню смяротнасці. Правядзенне вакцынацыі супраць грыпу на тэрыторыі раёна”, “Вынікі сацыяльна-эканамічнага развіцця Гродзенскай вобласці за студзень-верасень 2018 года”, “Аб становішчы з пажарамі і гібеллю людзей ад іх і прымаемых мерах стабілізацыі”.

 

 

У Дзятлаўскім раёне працавала абласная інфармацыйная група, якую ўзначаліў начальнік упраўлення мастацтва, культурна-асветніцкіх установаў, народнай творчасці і навучальных установаў Галоўнага ўпраўлення ідэалагічнай работы, культуры і па справах моладзі Гродзенскага аблвыканкама Сяргей Давыдзік. Спецыялісты сустрэліся з жыхарамі Жукоўшчынскага сельскага савета і калектывам Дзятлаўскага раёна газазабеспячэння.

– Дзяржава надае вялікае значэнне развіццю культуры. Пастаўлена задача – актывізаваць інтэлектуальныя і духоўныя сілы нашага народа, падтрымаць ініцыятывы, каб захаваць гістарычную спадчыну, падняць на новы ўзровень сучаснае мастацтва, выхаваць у грамадзян любоў да Айчыны, – адзначыў Сяргей Давыдзік. – Захаванню самабытнасці культуры нашага народа спрыяе Рэспубліканская праграма мерапрыемстваў па правядзенні ў Беларусі 2018-2020 гадоў пад знакам Года малой радзімы.

У сферу культуры прыходзяць інфармацыйныя тэхналогіі. Так, у 2015 годзе быў створаны інтэрнэт-партал нацыянальных культурных каштоўнасцей, база даных якога змяшчае інфармацыю аб гісторыка-культурнай спадчыне, што апынулася за межамі Беларусі. Функцыянуе некалькі тысяч сайтаў, прысвечаных пытанням культуры і мастацтва. Праваднікамі культуры ў масы з’яўляюцца звыш 60 тысяч спецыялістаў. Штогод на тэрыторыі нашай краіны праходзіць каля 60 фестываляў рознага ўзроўню. Дарэчы, адно са знакавых культурных мерапрыемстваў – Дзень беларускай пісьменнасць – у наступным годзе пройдзе ў горадзе Слоніме. Шмат увагі надаецца захаванню помнікаў гісторыі, падтрыманню таленавітай моладзі, развіццю турызму. Цяпер асабліва важна не ўпусціць час, не страціць нашу духоўную сутнасць.

З дакладамі таксама выступілі раённы педыятр Дзятлаўскай ЦРБ Таццяна Чыгір, інспектар Дзятлаўскага РАНС Дзмітрый Бобін, галоўны спецыяліст аддзела эканомікі райвыканкама Тамара Ляпешка. Ад іх удзельнікі сустрэчы даведаліся, што ў раёне актыўна ідзе вакцынацыя. Прышчэпку можна зрабіць на платнай і бясплатнай аснове. Абедзве вакцыны якасныя і зацверджаны Міністэрствам аховы здароўя. Цікава было даведацца, што да 2020 года ў Беларусі плануецца перакваліфікаваць тэрапеўтаў у дактароў агульнай практыкі, тым самым пашырыўшы іх функцыянал. А ратаўнікі парэкамендавалі вадзіцелям абавязкова мець у машыне спраўны вогнетушыцель, паколькі павялічылася колькасць пажараў з-за няспраўнасці вузлоў аўтамабіляў.

Ірына СТЫРНІК