Лічаныя дні застаюцца да святкавання Калядаў і Новага года, а ў школах хутка пачнуцца зімовыя канікулы. Як правесці святы весела і з задавальненнем? Што цікавае чакае дзятлаўчан і жыхароў раёна на Новы год і Каляды? Пра гэта карэспандэнтцы газеты “Перамога” расказала начальнік аддзела ідэалагічнай работы, культуры і па справах моладзі райвыканкама Наталля Калодка.
— Наталля Яўгенаўна, з чаго пачнуцца навагоднія святы ў нашым раёне?
— На Дзятлаўшчыне ўжо стартавала рэспубліканская дабрачынная акцыя “Нашы дзеці”: 11 снежня ў раённым цэнтры культуры і народнай творчасці адбылося яе ўрачыстае адкрыццё. Яна прадаўжаецца і абяцае падарыць шмат радасці і добрага настрою юным жыхарам раёна.
22 снежня ў 17.30 на плошчы 17 Верасня ў Дзятлаве запаліць агні галоўная ёлка раёна. Адбудзецца ўрачыстае шэсце казачных герояў, дзятлаўчане сустрэнуцца з Дзедам Марозам і Снягуркай.
З гэтага дня будуць запальвацца ёлкі у сельскіх саветах, калектыўных сельскагаспадарчых унітарных прадпрыемствах, паселішчах.
З 23 снежня ў дзіцячых садах, школах раёна, працоўных калектывах будуць ладзіцца ранішнікі.
— Якіх навагодніх сюрпрызаў чакаць дзецям?
— Пры жаданні дарослыя змогуць падарыць дзецям казачнае падарожжа: з 23 снежня па 7 студзеня будзе працаваць навагодні аўтобус. Яго маршрут пачынаецца ад Дзятлаўскага раённага цэнтра культуры і народнай творчасці і ўключае прыпынкі: “Галоўная ёлка” (на плошчы), “Казачны свет кнігі” (бібліятэка), “Навагодняя гісторыя” (музей), “Навагодняе мастацтва” (Дзятлаўская дзіцячая школа мастацтваў). Каб накіравацца ў падарожжа, можна падаваць групавыя заяўкі ў Цэнтр культуры ці індывідуальна патэлефанаваць на нумары 2-11-48 або 2-15-48 і запісацца (калі сфарміруецца група — жадаючым паведамяць пра гэта). Усю дадатковую інфармацыю таксама можна атрымаць па гэтых тэлефонах.
У рамках рэспубліканскай акцыі “Нашы дзеці” пройдуць тры навагоднія дабрачынныя ранішнікі: 26 снежня ў Цэнтры культуры — для дзяцей, якія засталіся без апекі бацькоў, дзяцей, змешчаных у прыёмныя сем’і і пад апеку;
27 снежня ў сярэдняй школе №1 горада Дзятлава — для дзяцей-інвалідаў; 28 снежня ў гімназіі №1 — для адораных дзяцей.
30 снежня юных жыхароў Дзятлаўшчыны чакае навагодняе музычнае інтэрактыўнае шоу з Машай і Мядзведзем “Але-оп у Новы год”. А 1 студзеня ў 13 гадзін у Цэнтры культуры пройдзе дзіцячы гарадскі ранішнік.
— Што работнікі культуры падрыхтавалі для дарослых?
— Цэнтр культуры прымае заказы на віншаванні ад Дзеда Мароза і Снягуркі. Казачныя героі прыедуць да жадаючых дахаты або ў працоўныя калектывы. З 1 снежня па пятніцах і суботах з 20.00 да 2.00 у рэстаране “Ліпічанка” ладзяцца вечары жывой музыкі. Тут можна правесці свята ці навагодні карпаратыў у вясёлай кампаніі з сябрамі.
31 снежня у 21.00 на плошчы райцэнтра пачынаецца святочная навагодняя праграма. Яе ўдзельнікаў чакаюць казачныя героі, жартоўная латарэя, песні, а ў 1.00 стартуе танцавальная праграма.
Дарэчы, з 15 па 30 снежня праводзіцца раённы агляд-конкурс на лепшае афармленне фасадаў будынкаў і прылягаючых тэрыторый прадпрыемстваў і арганізацый раёна, а таксама ўласных падворкаў жыхароў горада Дзятлава. Пераможцаў чакаюць грашовыя прэміі.
— Што цікавае чакаць на Каляды?
— 25 снежня ў аграгарадку Раклевічы будзе ладзіцца калядны абрад, да жыхароў завітаюць калядоўшчыкі. У гэты ж дзень у Дзятлаўскім раённым цэнтры культуры і народнай творчасці пройдзе музычна-каляднае шоу.
7 студзеня на праваслаўныя Каляды дзятлаўчан таксама чакае святочны канцэрт у Цэнтры культуры. У раёне будуць ладзіцца калядныя абрады, гучаць песні калядоўшчыкаў.
Ірына КАЎКЕЛЬ
