І папарыцца, і чаю папіць

Карысць лазні для арганізма чалавека вядомая са старажытных часоў. Нашы далёкія продкі правільна лічылі, што рэгулярнае наведванне парыльні дазваляе ўмацаваць здароўе, пазбавіць арганізм ад шкодных рэчываў, захаваць маладосць і падоўжыць жыццё. Яна карысная як для фізічнага, так і для маральнага здароўя, гэта выдатнае месца для таго, каб надаць увагу сабе і свайму целу, аздаравіцца і павысіць настрой. Сапраўдныя аматары лазні сцвярджаюць, што прыняцце ванны ці душа ніколі не падорыць таго ж адчування лёгкасці, чысціні і абнаўлення, як наведванне парыльні.

Традыцыя хадзіць у лазню захавалася і ў нашы дні. Правесці выхадныя або проста адпачыць душой і целам можна ў абноўленай лазні ў аграгарадку Хвінявічы.

Старая лазня, 1960 года пабудовы, якая размяшчалася ў будынку былой ветэрынарнай лячэбніцы, ужо патрабавала добрага рамонту. Два гады таму Мікалай Бубноўскі, дырэктар КСУП “Хвінявічы”, на балансе якога знаходзіцца лазня, улічыўшы і меркаванні людзей, вырашыў яе аднавіць.

Была зроблена вялікая работа, і вось на пачатку гэтага года лазня зноў адчыніла свае дзверы для наведвальнікаў.

У лазні з’явіўся вялікі пакой адпачынку, санвузел, якога, дарэчы, раней ніколі не было, ёсць мыйнае аддзяленне, парыльня, пакоі для пераапранання і для абслугоўваючага персанала.

Усе металічныя трубы заменены на поліпрапіленавыя, памянялі бакі для вады, уставілі пластыкавыя вокны, паклалі новую плітку. Сцены, а таксама лаўкі і шафкі – драўляныя, што вельмі радуе сапраўдных аматараў папарыцца, якія лічаць, што самая лепшая лазня павінна быць менавіта з дрэва, бо пах дрэва стварае асаблівую атмасферу, каларыт. Драўляную мэблю нам зрабілі на ТАА “Агражалезабетон”, за што вялікая ўдзячнасць работнікам і асабіста яго дырэктару Уладзіміру Сіневічу. Нават градуснік у парыльні драўляны.

Заўважу, што там ёсць і гігрометр – можна даведацца, якая вільготнасць паветра.

Таксама хочацца падзякаваць за выраб катлоў і дапамогу ў іх устаноўцы Слонімскаму ўпраўленню магістральных газаправодаў ААТ «Белтрансгаз» і яго кіраўніку Юрыю Бяссонаву.

У лазні працуюць два чалавеки – баншчык Станіслаў Муха і прыбіральшчыца Вера Губка. Нягледзячы на тое, што яны пенсіянеры, са сваімі абавязкамі спраўляюцца вельмі добра і адказна.

Радуе, што ў абноўленай лазні можна не толькі памыцца, але пасля і чаю папіць – дарэчы, абсалютна бясплатна. Любы жадаючы можа пачаставацца. У пакоі адпачынку знаходзіцца невялікая кухня, дзе самому можна прыгатаваць чай, каву. На асобным падносе стаіць драўлянае вядро з халоднай пітной вадой.

Новая лазня ў Хвінявічах адкрылася нядаўна, таму працуе пакуль адзін дзень на тыдзень – у суботу. З 15 гадзін 30 хвілін да 17 гадзін 30 хвілін могуць папарыцца жанчыны, а з 18 да 20 гадзін – мужчыны. Аднак гэта часова.

Калі будзе шмат наведвальнікаў, час працы можа і змяніцца. Магчыма, яна будзе працаваць два дні на тыдзень.

Дарэчы, у Хвінявіцкую лазню могуць прыходзіць, прыязджаць усе жадаючыя, а не толькі мясцовыя жыхары ці работнікі сельскай гаспадаркі. І цэны тут вельмі прывабныя: для дарослых уваходны білет каштуе 3 рублі, для дзяцей (да 14 гадоў) – 1 рубель.

Старшыня КСУП “Хвінявічы” Мікалай Бубноўскі таксама ўжо паспеў папарыцца ў новай лазні і застаўся вельмі задаволены. Ён упэўнены, што наведвальнікаў тут будзе шмат, і ўся работа па аднаўленні лазні была не дарэмная.

Аднак некаторыя дапрацоўкі яшчэ магчымыя, улічваюцца заўвагі і пажаданні наведвальнікаў. Мы плануем дэкарыраваць фасад лазні драўлянымі элементамі, паставіць дэкаратыўную агароджу. У гэтым нам дапамагае Леанід Шыпіла, за што яму вялікі дзякуй. Перад лазняй растуць бярозы, пасаджаныя былым намеснікам дырэктара па ідэалагічнай рабоце КСУП “Хвінявічы” Ірэнай Быстрыцкай. Мы будзем і далей добраўпарадкаваць тэрыторыю рознымі зялёнымі насаджэннямі: дрэвамі, кустамі.

Хочацца нагадаць, што два гады таму ў Рудзе Яварскай таксама была адкрыта адноўленая лазня, адрамантаваная сіламі КСУП “Хвінявічы”. Запрашаем усіх да нас у лазні па здароўе і добры настрой!

 

Святлана ГРЫШЫНА
Фота Вольгі ЮШКЕВІЧ