Многім здаецца, што тое, аб чым расказваюць на сельскіх сходах і прафілактычных мерапрыемствах – нейкая іншая, далёкая рэальнасць, і з імі такое напэўна не здарыцца.
Гэта татальная памылка, а тэма вясновага выпальвання сухой расліннасці, якая катком прайшлася па ўсёй Беларусі, не мінула і нас. Сёлета ў раёне ўжо зафіксаваны больш за 20 такіх здарэнняў, добра, што без чалавечых ахвяр. Але на сур’ёзныя грошы некаторыя дзятлаўчане ўсё ж “папалі”.
Так, жыхар Данілавіцкага сельскага савета гэтай вясной даведаўся адразу дзве рэчы. Па-першае, што спаліць сухую расліннасць і быць пакараным за такія дзеянні можна, нават не жадаючы гэтага. Па-другое, за спальванне травы на корані прэтэнзіі могуць прад’явіць не толькі супрацоўнікі МНС.
Пачыналася гэта гісторыя банальна, па-бытавому. Мужчына прыехаў на Дзятлаўшчыну з суседняй краіны, набыў нерухомасць, каб займацца бізнесам, а дакладней – гадаваць жывёлу. Каб абгарадзіць набыты ўчастак у адной з вёсак сельсавета, купіў дошкі для плоту, а каб яны служылі даўжэй – вырашыў пакрыць адпрацаваным машынным маслам, якое грэў на адкрытым агні на вуліцы.
У той дзень быў моцны вецер. Далей гісторыя разгортвалася як сюжэт вострасюжэтнага фільма. Проста на вачах у чалавека агонь перакінуўся на сухую траву побач і імкліва распаўсюдзіўся. Як вынік – агнём знішчаны 4800 квадратных метраў тэрыторыі агульнага карыстання. Які вынік такіх дзеянняў, расказаў начальнік раённай інспекцыі прыродных рэсурсаў і аховы навакольнага асяроддзя Дзмітрый Балькоўскі:
– У дзеяннях грамадзяніна прычыненне шкоды навакольнаму асяроддзю. Згодна з артыкулам 20 Закона “Аб раслінным свеце” выпальванне сухой расліннасці і яе астаткаў на корані забараняецца, калі іншае не прадугледжана заканадаўствам аб ахове навакольнага асяроддзя, аб ахове жывёльнага свету і ў сферы арганізацыі дзейнасці па забеспячэнні пажарнай бяспекі. Была складзена прэтэнзія аб нанясенні шкоды навакольнаму асяроддзю, якая з разліку на плошчу пашкоджання склала 1814 рублёў. Наўмысна ці выпадкова былі ўчынены такія дзеянні, не з’яўляецца прынцыповым аргументам. Акрамя таго, парушальнік будзе прыцягнуты да адміністрацыйнай адказнасці з вынясеннем папярэджання. Калі налічаная сума шкоды не будзе выплачана ў азначаны тэрмін, да яе дадасца штраф ад 10 да 30 базавых велічыняў.
Наталля АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#Дятловщина #палы
