У рэдакцыю газеты “Перамога” звярнуліся чытачы з пытаннем аб тым, ці дазваляецца выкарыстоўваць гараж у кааператыве не па прызначэнні.
– Прычым мы маем на ўвазе не з захоўваннем нейкіх рэчаў, а развядзеннем хатняй птушкі. Ці магчыма паўплываць на такіх суседзяў законна?
На гэта пытанне дала адказ начальнік аддзела камунальнай гаспадаркі і будаўніцтва райвыканкама Алена Грамко:
– У вырашэнні такой сітуацыі трэба кіравацца статутнымі дакументамі гаражнага кааператыву як аб’яднання грамадзян і заканадаўствам Рэспублікі Беларусь. Згодна з Указам Прэзідэнта Рэспублікі Беларусь № 43 ад 28 студзеня 2008 года гаражны кааператыў з’яўляецца добраахвотным аб’яднаннем грамадзян або грамадзян і юрыдычных асоб, індывідуальных прадпрымальнікаў, створаны на аснове членства для задавальнення патрэбаў у месцах захоўвання транспартных сродкаў. Адпаведна, калі нехта з членаў кааператыву не выконвае ўмовы карыстання сваім гаражом, зацверджаныя статутам кааператыву, пры гэтым дастаўляючы нязручнасці астатнім, такая сітуацыя разбіраецца на агульным сходзе ўдзельнікаў кааператыву. У выніку можа быць вынесена папярэджанне або пастаўлена пытанне аб пазбаўленні парушальніка членства ў гаражным кааператыве.
Наталля АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
