ГрадусПлюс. Каму трэба касіць траву?

На старонках газеты “Перамога” мы не раз уздымалі тэму навядзення парадку на зямлі. Сапраўдная праблема гэтага дажджлівага лета – трава, якая расце хутка і патрабуе пастаяннай увагі.

Пры гэтым, згодна з новым заканадаўствам, абавязкі па абкошванні травы на тэрыторыях агульнага карыстання сёння маюць не толькі камунальныя службы і адказныя арганізацыі, але і самі жыхары населеных пунктаў.

Аб нормах і адказнасці за парадак на зямлі нагадала начальнік аддзела архітэктуры і будаўніцтва райвыканкама Алена Грамко:

– Пастановай Савета Міністраў Рэспублікі Беларусь № 267 былі ўнесены змяненні ў Правілы добраўпарадкавання і ўтрымання населеных пунктаў. Нагадаем, што газон неабходна скошваць, калі трава дасягае больш за 20 сантыметраў. Грамадзяне на сваіх зямельных участках абавязаны абкошваць не толькі ўласныя ўчасткі, але і прылеглыя тэрыторыі – вуліцу, агульную тэрыторыю паміж суседнімі ўчасткамі, тэрыторыю за ўчасткам. За невыкананне патрабаванняў надыходзіць адміністрацыйная адказнасць у выглядзе штрафу да 25 базавых велічыняў. Для індывідуальных прадпрымальнікаў і юрыдычных асоб штрафы больш высокія, чым для фізічных.

Магчыма, некаторыя пра гэта не ведаюць або ўпарта робяць выгляд, што не знаёмы з заканадаўствам, нормы якога прапісаны адназначна. Каб праверыць гэту тэорыю, нават далёка хадзіць не трэба. У райцэнтры ёсць вуліцы, дзе зялёныя ўзбочыны па-за гравійнай дарозе маюць выгляд шахматнай дошкі: участкі, якія абкасілі ашчадныя гаспадары насупраць сваіх дамоў аж да дарогі чаргуюцца з суседнімі, дзе буяе трава. Фота, якое вы бачыце, носіць не ілюстрацыйны характар: гэта адна з вуліц Дзятлава, дзе адны косяць траву, а другія – “косяць” пад недасведчаных.

Наталля АВЯРЧУК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga