Актуальнае меркаванне. Гістарычная памяць – аснова працвітання грамадства

Член Пастаяннай камісіі Савета Рэспублікі па эканоміцы, бюджэце і фінансах, начальнік галоўнага фінансавага ўпраўлення Гродзенскага аблвыканкама Павел Ашурык разам з прадстаўнікамі адміністрацыі Кастрычніцкага раёна горада Гродна, прафсаюзаў, арганізацый, школьнікамі прыняў удзел ва ўрачыстым віншаванні ветэрана Вялікай Айчыннай вайны Мікалая Лагуткіна.

– Напярэдадні аднаго з важнейшых і сакральных святаў – Дня Перамогі мы аддаём даніну павагі тым людзям, якія 81 год таму набліжалі гэту свяшчэнную і вялікую радасць. Гістарычная Перамога не прыйшла сама па сабе – была выкавана цаной болю і страт мільёнаў жыццяў. Сярод тых, хто выжыў і дажыў да нашага часу, засталося зусім няшмат сведкаў і наглядных прыкладаў мужнасці, стойкасці і адвагі.

Мы сустрэліся з адным з нямногіх відавочцаў і удзельнікаў Вялікай Айчыннай вайны – Мікалаем Лагуткіным, які ў канцы мінулага года адзначыў свой векавы юбілей.

Вялікі гонар пабачыць і асабіста падзякаваць ветэрану за мірнае неба для нас. З горыччу ў наш час даводзіцца назіраць за змаганнем на ідэалагічным фронце за захаванне гістарычнай праўды аб нашай Перамозе – таго, што не належыць аспрэчванню або доказам.

Асабліва каштоўна, што разам з прадстаўнікамі розных структур ва ўшанаваннях прымаюць удзел дзеці. Яны павінны  ведаць і разумець людзей, якія разам з іншымі ўдзельнікамі вайны вярнулі мір на нашу зямлю. Ветэраны – жывая памяць і бар’ер, які не дапускае ўплыву на сучаснае пакаленне для абельвання зверстваў нацыстаў і іх памагатых. Выраз “ніхто не забыты, нішто не забыта” павінен стаць сапраўдным дэвізам для падрастаючага пакалення беларусаў. Выхаванне ў моладзі безумоўнай павагі да факту свяшчэннага подзвігу нашых продкаў у здабытай Вялікай Перамозе і цесная сувязь пакаленняў, якія памятаюць і шануюць сваю гісторыю, – аснова для працвітання нашага грамадства.

Свяшчэнным абавязкам кожнага беларуса з’яўляецца захаванне гістарычнай нескажонай цаны міру, праўды, памяці аб жахах мінулай вайны. Варта адзначыць, што цяперашняе мерапрыемства – адно з нямногіх у шэрагу ўшанаванняў ветэранаў Гродзеншчыны, і да Мікалая Лагуткіна перад знамянальнай датай яшчэ не раз прыйдуць з віншаваннямі прадстаўнікі арганізацый і іншых структур. Гэта і ёсць адно з праяўленняў таго, што беларусы памятаюць і шануюць подзвігі Вялікай перамогі, – падкрэсліў сенатар.

Ірына СТЫРНІК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga