На кожным з 24-х участкаў для галасавання пануе святочная, і ў той жа час дзелавая атмасфера: да свайго выбару людзі ставяцца сур’ёзна.
Некаторымі лічбамі і фактамі дзеліцца старшыня ўчастковай выбарчай камісіі Чырвонаармейскага ўчастка для галасавання №11 Людміла Канавалік:
– На ўчарашні дзень на нашым участку датэрмінова прагаласавала звыш 40% выбаршчыкаў. Усяго іх унас – 1812 чалавек. За першую гадзіну работы участка 18 лютага сваё права выбара рэалізавалі больш за 60 грамадзян.
Да гэтага пік актыўнасці быў у чацвер на праваслаўнае свята, калі вернікі ішлі з храма і заадно прыходзілі галасаваць. У пятніцу таксама было шматлюдна: прыходзілі пераважна працоўныя людзі, хто ведаў, што не зможа трапіць на выбары ў выхадны.
Сёння з раніцы было шмат пажылых сямейных параў, пасля 10 гадзін актывізаваліся маладыя сем’і з дзецьмі.
Таксама мы плануем выехаць да некаторых нашых выбаршчыкаў па месцы жыхарства з пераноснай скрыняй. Людзей, якія чакаюць членаў участковай выбарчай камісіі на дом, больш за 25. Гэта пераважна пажылыя грамадзяне 1929-1939 гадоў нараджэння або інваліды, адным словам тыя, каму цяжка самастойна прыйсці на ўчастак.
