З 4 па 10 лютага ў горадзе Гродне пройдзе XVII Міжнародны фестываль праваслаўных песнапенняў “Каложскі Благавест”. Госці пачуюць нямала цікавых калектываў і манераў выканання. У гэтым годзе прадставіцца магчымасць пазнаёміцца з калектывамі з Македоніі і Чарнагорыі. У рамках фестывалю адкрыюцца тэматычныя выставы, пройдзе кіналекторый, вечар духоўнай паэзіі і аўтарскай песні.
5 лютага ў Гродзенскім абласным метадычным цэнтры народнай творчасці будзе праходзіць абласная выстава студый выяўленчага і дэкаратыўна-прыкладнога мастацтва “Святло нашай душы”, якая прымеркавана да фестывалю “Каложскі Благавест”. Выстава ўразіць разнастайнасцю мастацкіх кірункаў і тэхнік. У працах будуць адлюстраваны светапогляд адораных дзяцей і падлеткаў, іх стаўленне да нязменных духоўных каштоўнасцяў.
З 5 па 14 лютага Мастоўскі раённы цэнтр рамёстваў запрашае на выставу-продаж сувеніраў да Дня ўсіх закаханых “Валянцін і Валянцінка”. Магчымасць парадаваць сваіх любімых падарункамі “хэнд мэйд” прадаставяць жыхарам і гасцям горада майстры раённага цэнтра рамёстваў.
11 лютага ў аграгарадку Беліца Лідскага раёна пройдзе раённы конкурс традыцыйнай кухні “Спазнай смак сваёй кухні”. Удзельнікі конкурсу будуць рыхтаваць посныя стравы, якія гатавалі продкі ў Калядны і Велікодны пост. Прысутныя не толькі змогуць узяць рэцэпты страваў, якія ім спадабаліся, але і прадэгуставаць іх. Гасцей свята чакае сустрэча з доктарам-валеолагам, які раскажа аб здаровым харчаванні.
11 лютага аграгарадок Пераганцы Воранаўскага раёна запрашае на свята бліноў “Бліны з ранку і ў абед – будзем жыць усе без бед”. Кожны жадаючы зможа пачаставацца блінамі, гарачым чаем і юшкай, наведаць майстар-клас па выпечцы бліноў ад мясцовых гаспадыняў, паўдзельнічаць у гульнях, у конкурсах, пакатацца на брычцы, набыць сувенір, паглядзець канцэрт.
11 лютага ў аграгарадку Морына Іўеўскага раёна пройдзе свята юшкі “Морынская залатая рыбка”. Свята адбудзецца на маляўнічым беразе Нёмана. У праграме – сустрэча з казачнай выканаўцай жаданняў, канцэрт калектываў аматарскай творчасці, вясёлыя конкурсы і забавы, дэгустацыя юшкі, прыгатаванай па розных фірмовых рэцэптах.
11 лютага ў 12 гадзін гарадскі пасёлак Мір запрашае на народнае гулянне “Вось дык Масленіца!”. Гасцей чакае насычаная анімацыйная праграма “Вясну сустракаем — Зіму выпраўляем”, гульні, конкурсы, атракцыёны, выступленні артыстаў, беларускія сувеніры, спальванне чучала зімы. Самыя актыўныя ўдзельнікі змогуць абмяняць заробленыя ў аніматараў манеты на дэгустацыю бліноў.
11 лютага свята“Масленіца” таксама будзе праходзіць: гарадскі пасёлак Зэльва, 12 гадзін; Іўеўскі раён, аграгарадок Лаздуны-1, 14 гадзін; горад Дзятлава, 11 гадзін; горад Смаргонь, 12 гадзін; горад Шчучын, 11 гадзін; горад Ашмяны, 13 гадзін. У праграме: спаборніцтвы, традыцыйныя народныя забавы і гульні з прызамі.
Увесь люты штотыдзень у сераду, пятніцу, суботу і нядзелю з 11 да 19 гадзін у Гродзенскім гарадскім цэнтры культуры па вуліцы Савецкай будзе праходзіць выстава-кірмаш вырабаў народнага аматарскага аб’яднання майстроў народнай творчасці і мастакоў “Гарадзенскі каларыт”. На кірмашы гродзенцы і госці горада могуць набыць эксклюзіўныя сувеніры ручной работы, у тым ліку і з беларускай сімволікай.
Алена МІКАЛАЕВА
