Дзятлаўскі гісторыка-краязнаўчы музей сёлета зноў падключыўся да культурнай акцыі “Ноч музеяў”. Мерапрыемства прайшло пад назвай “Музей збірае сяброў”. Яно было прымеркавана да 70-годдзя Вялікай Перамогі.
На імправізаванай сцэне перад уваходам у музей разгарнулася тэатралізаванае прадстаўленне “Фарбы Перамогі”. Удзел у ім узялі школьнікі горада. У вершаваных радках яны ўзгадалі гісторыю Вялікай Айчыннай вайны, шлях да Перамогі. Своеасаблівым сімвалам яе сталі выпушчаныя ў неба галубы.
Вялікай Перамозе дзеці, а таксама работнікі Дзятлаўскага раённага цэнтра культуры і народнай творчасці прысвяцілі шэраг музычных нумароў. “Жураўлі”, Смуглянка”, “Кацюша” — гэтыя і іншыя вядомыя песні ваенных гадоў прагучалі ў выкананні Васіля Шпігановіча, Яўгена Калодкі, Ганны Харлінскай. Сваёй творчасцю парадавалі народны ансамбль музыкі і песні “Ятранка”, Наваельнянскі духавы аркестр. Запомнілася і выступленне самага юнага артыста канцэртнай праграмы — Арсеня Чыгіра, які выканаў песню пра салдата.
Разам з праглядам тэатралізаванага прадстаўлення жыхары горада маглі наведаць выставу-продаж “Горад майстроў”, набыць прыгожыя рэчы, паўдзельнічаць у латарэі. Непасрэдна ў музеі працавалі выставы “Зброя Перамогі”, стэндавага мадэлізму Цэнтра творчасці дзяцей і моладзі г. Дзятлава, Казлоўшчынскага дома інтэрнаната для псіханеўралагічных хворых. Таксама свае новыя работы — патрэты ўладароў Дзятлава, яго вядомых людзей — прэзентаваў вядомы мастак-кераміст Мікалай Несцярэўскі.
Акрамя гэтага, арганізатары мерапрыемства “Музей збірае сяброў” прапанавалі яго наведвальнікам паспрабаваць сваю трапнасць у ціры, паўдзельнічаць у танцавальнай праграме. У час свята таксама працавалі гандлёвая кропка Дзятлаўскага філіяла Гродзенскага аблспажыўтаварыства, атракцыёны для дзяцей.
А. ДУБРОЎСКАЯ
