У мерапрыемствах Дня моладзі на “Славянскім базары” ў Віцебску сёлета прыняў удзел і Беларускі гульнёвы тэатр роставых лялек “Лялькі для ўсіх”. Якую праграму дзятлаўскія артысты падрыхтавалі для наведвальнікаў фестывалю? Якія ўражанні прывезлі самі артысты з мерапрыемства? Якія гастрольныя планы надалей? На гэтыя пытанні карэспандэнтцы газеты адказаў кіраўнік тэатра Іван Каско.
— Іван Іванавіч, хто запрасіў вас паўдзельнічаць у “Славянскім базары” ?
— Запрашэнне мы атрымалі ад Гродзенскага абласнога камітэта грамадскага аб’яднання “БРСМ”. Папярэдне яны пазнаёміліся з дзейнасцю нашага тэатра, наша выступленне спадабалася.
А вось ужо ад адміністрацыі абласнога метадычнага цэнтра горада Віцебска мы атрымалі прапанову даць два прадстаўленні на плошчы Свабоды.
— З якой праграмай ездзілі на фестываль?
— Праграма называлася “Вясёлыя падарожжы мультгерояў па казках”. Дзятлаўчане маглі пабачыць яе ў рамках святочных мерапрыемстваў да Дня Незалежнасці.
Таксама ў Віцебску мы паказалі шоу мыльных пузыроў. Дарэчы, цяпер у нас ёсць ноу-хау — вогненны мыльны пузыр.
Акрамя гэтага, артысты тэатра прынялі ўдзел ва ўрачыстым шэсці моладзевай дэлегацыі Гродзеншчыны, у прэс-канферэнцыі. Да ўсяго дадам, што з нашымі роставымі лялькамі актыўна фатаграфаваліся. Цікавіліся людзі і з чаго зроблены лялькі. Вельмі здзіўляліся, што ўсе яны пашыты ўручную.
— Як успрынялі прадстаўленне гледачы?
— Вельмі добразычліва. У праграме актыўна ўдзельнічалі дзеці.Ім дапамагалі ўзабірацца на сцэну іх бацькі.
— Іван Іванавіч, а ці давялося артыстам тэатра пабыць у ролі гледачоў? Якія фестывальныя мерапрыемствы пабачылі? Што ўразіла?
— Вельмі ўразіў начны Віцебск — вельмі прыгожы горад. Запомніліся выставы-кірмашы, фаер-шоу, бітва ды-джэяў, форум вулічных тэатраў. І ўсё гэта ў начным фармаце. Незабыўнае відовішча.
— А якія гастрольныя падзеі яшчэ чакаюць артыстаў тэатра роставых лялек?
— Гэта ўдзел у мерапрыемствах да Дня пісьменнасці ў Шчучыне, у фестывалі “Карнавал весялосці”, які пройдзе ў Воранаве. У бліжэйшы час наведаем Палац культуры чыгуначнікаў у Ваўкавыску. Плануем выступіць у Палацы культуры чыгуначнікаў у Мінску. Магчымы гастролі ў Мар’іну Горку па запрашэнні прадзюсарскага цэнтра Мельнікава.
Увогуле, запрашэнняў вельмі шмат. Аднак з улікам таго, што калектыў дзіцячы і артысты вучацца ў школе, не заўжды атрымліваецца паўдзельнічаць у тых мерапрыемствах, куды нас запрашаюць.
А лета ў Беларускага тэатра роставых лялек сапраўды “гарачае”. Вандроўкі, гастролі. Роставыя лялькі пастаянна ў дарозе. Аднак гэта не стамляе артыстаў. Вось і на “Славянскі базар” яны прыехалі бадзёрымі і вяселымі, нягледзячы на 10 гадзін знаходжання ў дарозе. Вядома, шкада, што не атрымалася трапіць на фестываль усім артыстам тэатра. Колькасць месцаў была абмежаваная: едзілі толькі 13 чалавек. Іх суправаджалі я, Аляксандр Раеўскі і Аксана Кашляк.
— Іван Іванавіч, а ці з’явіліся ў тэатры новыя персанажы?
— Зусім нядаўна з’явіўся Патрык — сябар Губкі Боба — вядомага і любімага персанажа аднайменнага мультфільма. Гэтая роставая лялька таксама ёсць у нашым тэатры. Дарэчы, гэтага героя вельмі любяць дзеці. І ў час “Славянскага базара” песню Губкі Боба актыўна падхоплівалі дзеці, а таксама,што мяне здзівіла, падлеткі.
Плануем, што і далей у тэатры будуць з’яўляцца новыя роставыя лялькі. Магчыма, ужо бліжэй да Новага года.
— А над чым цяпер працуе тэатральная студыя “Мелодыя душы”?
— Па просьбе айца Мікалая артысты студыі рыхтуюць пастаноўку “Як князь Уладзімір веру выбіраў”. Яна будзе паказана 25 ліпеня. А ў далейшых планах — паўдзельнічаць у фестывалі аматарскіх тэатральных калектываў у Слоніме. Пакуль жа ў тэатральную студыю ідзе набор новых артыстаў.
— Іван Іванавіч, вы яшчэ і кіраўнік тэатра мыльных пузыроў…
— Так. Увогуле, цяпер шоу мыльных пузыроў вельмі папулярныя ў розных краінах. У той жа Маскве, Санкт-Пецярбургу праходзяць фестывалі мыльных пузыроў. Варта, каб яны былі і ў Беларусі.
Хаця працаваць з мыльнымі пузырамі даволі складана. У нашым тэатры пакуль яшчэ толькі чатыры чалавекі могуць добра адпрацоўваць нумары з мыльнымі пузырамі на сцэне. Гэта Вольга Іода, Кацярына Губко, Вікторыя Свяцецкая, Ліза Салата. Дарэчы, дзяўчаты задзейнічаны адразу ў трох тэатрах, як і многія іншыя дзеці. Гэта ім падабаецца, гэта — частка іх жыцця.
Яшчэ дадам, што ўжо падрыхтаваны дакументы, каб Беларускі гульнёвы тэатр роставых лялек атрымаў званне “узорны”.
А. ДУБРОЎСКАЯ
Фота прадастаўлена кіраўніком тэатра Іванам Каско.
