Дзелавы панядзелак. Парадак: ёсць ці няма?

Навядзенню парадку на зямлі было нададзена найбольш увагі на штотыднёвай нарадзе старшыні райвыканкама Андрэя Садоўскага.

На камісійны абыход

На мінулым тыдні ратаўнікі раёна тройчы выязджалі на ліквідацыю ўзгаранняў сухой расліннасці.

– Выклікае напружанне гэта статыстыка, бо практычна ўсе травяныя выпальванні адбываюцца па віне чалавека, з-за яго легкадумных учынкаў. А ў раёне, асабліва ў маланаселеных вёсках або у якіх наогул няма жыхароў, шмат участкаў, якія недагледжаны, своечасова не абкошаны – яны ствараюць пажарную небяспеку. Дарэчы, не толькі пажарную, але і ў выглядзе закінутых, пры гэтым незачыненых і незасыпаных калодзежаў, нябачных у высокай траве, – адзначыў кіраўнік раёна Андрэй Садоўскі і ўзгадаў нядаўнюю трагедыю ў Лідскім раёне, калі мужчына накіраваўся па яблыкі ў закінуты дачны кааператыў і патануў у такім калодзежы.

Андрэй Уладзіміравіч даў заданне адказным службам і старшыням сельвыканкамаў на гэтым тыдні камісійна абследаваць вызначаныя населеныя пункты, правесці прафілактычныя гутаркі з мясцовымі жыхарамі.

– За парадак на тэрыторыях адказваюць не толькі арганізацыі, але і людзі, якія таксама з’яўляюцца землекарыстальнікамі. Недапрацоўвае служба землеўпарадкавання, якая павінна кантраляваць сітуацыю, – падрахункаваў старшыня райвыканкама.

“Не сціхае” работа на палях

Шмат задач пакуль у дзятлаўскіх аграрыяў. Да першага верасня павінны завяршыць сеў азімага ячменю, распачаць пасеў азімых на зялёны корм, прыступіць да ўборкі грэчкі. У гаспадарках яе – прыкладна па 50 гектараў у кожнай. З першага дня восені пачнецца ўборка бульбы. Па завярэннях спецыялістаў упраўлення сельскай гаспадаркі і харчавання райвыканкама, тэхніка да гэтых работ поўнасцю гатова. КСУП “Жукоўшчына” пачало ўборку кукурузы, “падцягнуцца” гэтымі днямі “Граніт-Агра”, “АграМілк” і “Войневічы”.

Акрамя галоўных “уборачна-пасяўных” пытанняў, старшыня райвыканкама звярнуў увагу аграрыяў на навядзенне парадку на зямлі, прагучалі і заўвагі, паколькі некаторыя гаспадаркі пры ўзворванні пакідаюць участкі ўрадлівай глебы неапрацаванымі, якія пасля зарастаюць кустоўем.

Не чакаць наступстваў

У якім выглядзе будзе працякаць чарговая хваля каранавіруснай інфекцыі COVID-19, якую медыкі прагназуюць ужо ў верасні, не ведае ніхто. Безумоўна, лепш абараніцца ад цяжкіх наступстваў, зрабіўшы прышчэпку або прайшоўшы рэвакцынацыю. Дарэчы, рэвакцынацыя на Дзятлаўшчыне праходзіць даволі актыўна, паказчык вышэйшы за сярэднеабласны – усяго па раёне прайшлі рэвакцынацыю 7202 чалавекі, што складае 30,9 % ад агульнай колькасці насельніцтва. Прышчапляюцца і непаўналетнія – ужо вакцынавана 304 дзіцяці (ад 5 да 17 гадоў).

Ірына КАМАРОВА

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga