Дыялогавая пляцоўка. Зроблена нямала, яшчэ больш належыць зрабіць

24 лютага выдалася багатым на падзеі для жыхароў гарадскога пасёлка Казлоўшчына.

Дэлегат VI Усебеларускага народнага сходу, старшыня Казлоўшчынскага сельвыканкама Вадзім Бялатка дзяліўся ўражаннямі ад форуму з калектывам Казлоўшчынскай гарпасялковай бальніцы. Затым разам са старшынёй раённага Савета дэпутатаў Аляксандрам Бараноўскім, таксама дэлегатам усебеларускага форуму, ён прыняў удзел у рабоце першай у раёне дыялогавай пляцоўкі па пытаннях VI Усебеларускага народнага сходу, якая таксама праходзіла ў Казлоўшчыне.

– Чырвоным радком праз увесь форум праходзіла думка аб неабходнасці аб’яднацца, – зазначыў Вадзім Аляксандравіч. – Толькі разам беларусы змогуць стаць эканамічна мацнейшымі і незалежнымі. Яшчэ адзін важны тэзіс сходу – берагчы традыцыйныя сямейныя каштоўнасці, падтрымліваць сем’і з дзецьмі і клапаціцца аб дэмаграфічнай бяспецы.

Спадабаліся яму выступленні дэлегатаў і гасцей форуму, асабліва сербкі Іваны Джыган. Яна расказала аб тым, як пачалася вайна і быў унесены раскол у грамадства на яе Радзіме. Цяпер у каляровых рэвалюцый і без ваенных, дастаткова сродкаў, каб раздзяліць людзей, што ў 2020 годзе на сабе адчулі і беларусы.

– Перамены ў нашай краіне будуць, але шляхам навуковага, эканамічнага і тэхнічнага прагрэсу. Адно з новаўвядзенняў анансаваў Прэзідэнт. Хутка будзе створана канстытуцыйная камісія, якая выпрацуе змяненні ў галоўны дакумент Беларусі. Рэферэндум па прыняцці новай Канстытуцыі будзе сумешчаны з выбарамі ў мясцовыя Саветы дэпутатаў, значыць, адбудзецца ў канцы гэтага ці пачатку наступнага года, – дадаў дэпутат.

– Нам пашчасціла трапіць у склад дэлегацыі Дзятлаўшчыны для ўдзелу ў народным сходзе, – падзяліўся сваімі уражаннямі ад форуму Аляксандр Барноўскі. – Наша дэлегацыя складалася з 10 чалавек: 7 – былі абраны раённым Саветам дэпутатаў, яшчэ тры – грамадскімі аб’яднаннямі раёна. За два дні работы былі падведзены вынікі мінулай пяцігодкі, распрацаваны і абмеркаваны задачы на наступную. Хачу падкрэсліць, што за апошнія гады ў Беларусі, нават на Дзятлаўшчыне і ў вашым пасёлку ў прыватнасці, зроблена нямала, яшчэ больш належыць зрабіць.

На Гродзеншчыне сярод важкіх праектаў на пяцігодку – будаўніцтва новага ўчастка завода “Азот” і дрэваапрацоўчага цэху ў Свіслацкім раёне.

На Дзятлаўшчыне ў бліжэйшы час плануецца пабудаваць 2 станцыі абезжалезвання ў Раклевічах і Лапушне, 72-кватэрны жылы дом – у райцэнтры; рэканструяваць кацельню каля дзятлаўскага кінатэатра, 2 малочнатаварныя фермы – у сельгаспрадпрыемстве “АграМілк”, вентыляцыю – у асноўным вытворчым корпусе ААТ “Молочный Мир”; замяніць кацёл на Парэцкім участку ААТ “Дзятлаўскі лікёра-гарэлачны завод “Алгонь”, скончыць будаўніцтва чацвёртага корпуса санаторыя “Радон” і многае іншае. Аднак для дасягнення пастаўленых мэтаў сумленна працаваць павінен кожны!

Жыхары гарадскога пасёлка Казлоўшчына пацікавіліся ў выступаючых, як у далейшым будзе выкарыстоўвацца будынак ранейшага ўнівермага.

Вадім Бялятка патлумачыў, што цяпер будынак выкуплены, яго ўласнік праводзіць рамонт. Як раней паведамляў новы гаспадар, пасля завяршэння рамонту ён збіраецца здаваць памяшканні ў арэнду пад гандлёвыя аб’екты, у тым ліку сецявому бізнесу.

Ірына СТЫРНІК