Дэпутацкія клопаты. У Казлоўшчыне запыты насельніцтва задавальняюцца

Забяспечанасць гандлёвых аб’ектаў раёна школьнымі таварамі прадаўжаюць адсочваць дэпутацкі корпус і дзяржаўныя службы.

У магазінах Дзятлаўскага філіяла Гродзенскага аблспажыўтаварыства “Дамавічок” і “Родны Кут” гарадскога пасёлка Казлоўшчына з маніторынгам пабывалі старшыня раённага Савета дэпутатаў, лідар раённага аддзялення Гродзенскай вобласці Беларускай партыі “Белая Русь” Аляксандр Бараноўскі, начальнік аддзела ідэалагічнай работы і па справах моладзі райвыканкама Вольга Рагачова і старшыня Казлоўшчынскага сельскага выканаўчага камітэта Ала Гародка. Заадно ацанілі ў цэлым асартымент харчовай і нехарчовай прадукцыі для жыхароў пасёлка гарадскога тыпу.

Магазіны знаходзяцца побач, на іх паліцах шмат усяго, што можа спатрэбіцца як бацькам школьнікаў, так і звычайнаму пакупніку. Інспектары адзначылі дастойны выбар у “Дамавічку” канцылярскіх рэчаў, было ў асартыменце школьнае адзенне, рукзакі, а таксама бытавая тэхніка, посуд, іншыя патрэбныя ў побыце тавары. Прапанова харчовага “Роднага Кута” – шырокі выбар крупаў, малочнай і мясной прадукцыі, каўбасаў, ёсць садавіна і агародніна.

– Для такога населенага пункта, як Казлоўшчына, лічу, даволі дастойны асартымент, – даў ацэнку Аляксандр Бараноўскі. – У добрым стане і выбары школьнае адзенне, рукзакі, алоўкі, сшыткі, іншая канцылярыя. Калі параўноўваю аграгарадок Дварэц і гарпасёлак Казлоўшчына, не ведаю, чаму ў гандлёвых аб’ектах аднаго і таго ж падпарадкавання (аблспажыўтаварыства)  карціна з прысутнасцю тавараў адрозніваецца. Прадаўцам, якія адказна адносяцца да сваёй справы, дзякую за забеспячэнне разнастайнасці тавараў для насельніцтва. Прыемна бачыць, калі аб пакупніках клапоцяцца і ўлічваюць іх запыты.

Ірына СТЫРНІК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#нашелучшее #нашалепшае