Давер насельніцтва, дапамога мясцовых жыхароў у папярэджанні і раскрыцці правапарушэнняў вельмі важныя для паспяховай работы ахоўнікаў правапарадку. Вось і нядаўна такое супрацоўніцтва дало плён у рабоце міліцыі. На працоўнай нарадзе ў прысутнасці асабовага саставу Дзятлаўскага райаддзела міліцыі жыхарам аграгарадка Гезгалы Наталлі Васільеўне Вітко і Аляксандру Аляксандравічу Адамчыку (камандзіру добраахвотнай дружыны пры Жукоўшчынскім сельскім савеце) былі ўручаны грашовыя прэміі за аказанае садзеянне органам унутраных спраў пры раскрыцці асабліва цяжкага злачынства.
А здарылася гэта так. У адзін з вечароў на пульт аператыўна-дзяжурнай службы аддзела ўнутраных спраў Дзятлаўскага райвыканкама паступіла паведамленне ад работнікаў “хуткай дапамогі”. Медыкі расказалі, што дапамаглі грамадзяніну, у якога дыягнаставалі пералом нагі. Траўму, па словах пацыента, яму нанеслі, гэта значыць, здарэнне мела крымінальны характар.
У бальніцу накіраваліся супрацоўнікі міліцыі і раённага аддзела Следчага камітэта Рэспублікі Беларусь. У час размовы з імі пацярпелы, які знаходзіўся ў стане алкагольнага ап’янення, даваў блытаныя паказанні. Аднак стала зразумела, што напалі невядомыя, пабілі і забралі прадукты харчавання.
Агляд месца здарэння, іншыя праведзеныя тэрміновыя аператыўна-вышукавыя і следчыя мерапрыемствы не пацвердзілі праўдзівасці словаў пацярпелага. Міліцыя прадоўжыла высвятляць абставіны здарэння. Тады на дапамогу праваахоўнікам прыйшлі жыхары аграгарадка Гезгалы Наталля Васільеўна Вітко і Аляксандр Аляксандравіч Адамчык. Яны расказалі пра акалічнасці здарэння, аднавілі малюнак падзеяў, з чым пазней поўнасцю пагадзіўся пацярпелы.
Аказалася, што тым вечарам мужчына сустрэў свайго раней судзімага знаёмага. У пацярпелага ў руках была бутэлька піва, якое захацеў пакаштаваць суразмоўца. У час распіцця алкагольнага напою паміж імі пачалася сварка. Агрэсар ударыў пацярпелага нагою па назе, прычыніўшы цяжкія цялесныя пашкоджанні. Па факце здарэння была ўзбуджана крымінальная справа з катэгорыі “асабліва цяжкіх” па артыкуле 202 частка 3 Крымінальнага кодэкса Рэспублікі Беларусь — разбой, учынены з нанясеннем цяжкага цялеснага пашкоджання. Такім чынам, дзякуючы ўважлівасці і неабыякавасці грамадзян, выявілася праўда. Дзятлаўская міліцыя ўдзячна Наталлі Васільеўне і Аляксандру Аляксандравічу за дапамогу ў высвятленні абставінаў здарэння.
А. ЗЕНАЎ,
першы намеснік начальніка АУС Дзятлаўскага райвыканкама
