Беларусь маладая. “Лёд і полымя” сустрэлі ў Гезгалах

На Гродзеншчыне стартаваў новы сезон рэспубліканскага патрыятычнага працоўнага праекта “Зімовы маршрут”, які праходзіць з ініцыятывы Беларускага рэспубліканскага саюза моладзі.

29 студзеня атрад “Лёд і полымя” імя Героя Савецкага Саюза А. М. Кіжэватава сустрэўся з навучэнцамі Гезгалаўскай сярэдняй школы імя М. І. Нядзеліна. Па традыцыі на ўрачыстым сходзе камандзір атрада Сава Пажога ўручыў знак-сімвал моладзевага праекта дырэктару ўстановы Эдуарду Ненартовічу.

– Прыемна вітаць у Гезгалах лепшых студэнтаў Беларусі, – падзякаваў Эдуард Іосіфавіч, уручаючы студатрадаўцам падарунак ад школьнікаў. – Нашы выпускнікі таксама валанцёры і актывісты, хутка і яны стануць студэнтамі і, спадзяюся, будуць раўняцца на вас. Наш аграгарадок вядомы тым, што ў свой час тут базіраваліся савецкія ракетныя вайсковыя часці, якія абаранялі краіну надзейным шчытом, а наша школа носіць імя вядомага ваеннага начальніка Мітрафана Нядзеліна. Няхай гэты падарунак нагадвае вам пра наведванне нашых мясцін.

Байцы пачалі сваю місію з гімна студатрадаўцаў, які выканалі разам. Расказалі, што навінкай “Зімовага маршруту-2025” стаў удзел у праекце адразу двух атрадаў – “Азімыя” Гродзенскага дзяржаўнага аграрнага ўніверсітэта і зводнага “Лёд і полымя”, што аб’яднаў маладых людзей з розных ВНУ нашай краіны. Адпраўной кропкай сёлетняга “Зімовага маршруту” 27 студзеня стаў горад Навагрудак. Байцы студэнцкіх атрадаў наведваюць сельскія і гарадскія школы, праводзяць прафарыентацыйныя сустрэчы са старшакласнікамі па прынцыпе “роўны вучыць роўнага”, майстар-класы для навучэнцаў малодшых класаў, патрыятычныя акцыі ў памяць аб героях і ахвярах Вялікай Айчыннай вайны, аказваюць шэфскую дапамогу ветэранам і адзінокім пажылым людзям. Таксама ў праграме сустрэч – творчыя канцэрты з запрашэннем жыхароў населеных пунктаў.

Для гезгалаўскіх школьнікаў байцы падрыхтавалі адукацыйна-гульнявую праграму “Вайны звязаныя старонкі”, майстар-класы па вырабе сувеніраў і арыгамі, інтэлектуальную гульню “Атамны адрэналін”, спаборніцтвы па валейболе і многае іншае. Таксама яны расказалі пра свае навучальныя ўстановы і ўдзел у студатрадаўскім руху.

Прыемным момантам сустрэчы стала ўрачыстая цырымонія развітання дзевяцікласнікаў з піянерскім гальштукам і ўручэнне ім членскіх білетаў ГА “БРСМ”. Яе правялі першы сакратар раённага камітэта ГА “БРСМ” Кацярына Хілімончык і педагог-арганізатар школы Наталля Ліцкевіч. Паўдзельнічалі ва ўрачыстасці і студатрадаўцы. Усяго ў гэты дзень рады раённага моладзевага аб’яднання папоўнілі дзесяць юных гезгальцаў.

– Сёння значны дзень. Вы сустрэлі ў сваёй школе “Зімовы маршрут”, шмат даведаліся пра студатрадаўскі рух і дзейнасць Беларускага рэспубліканскага саюза моладзі ў цэлым, – павіншавала новых членаў аб’яднання Кацярына Хілімончык. – Насіце свае значкі “БРСМ” годна і ведайце, што заўжды можаце праявіць сябе ў розных кірунках дзейнасці вялікай моладзевай сям’і. Пакуль жа ваша задача – старанна вучыцца, каб упэўнена стаць на далейшую жыццёвую дарогу. Поспехаў вам.

Ад імя дзевяцікласнікаў з вітальным словам выступіла Аляксандра Каско. Яна павіншавала сваіх сяброў з адметнай падзеяй і паабяцала, што ўсе яны таксама будуць смелымі, актыўнымі, крэатыўнымі ўдзельнікамі моладзевага руху.

Шмат радасці і пазітыву навучэнцам, педагогам і гасцям прынёс творчы канцэрт ад байцоў атрада “Лёд і полымя”.

Праграма сустрэчы прадоўжылася на спартыўна-працоўнай ноце: паралельна былі арганізаваны спаборніцтвы па валейболе, працоўны дэсант па ўборцы мясцовага помніка і наведванне валанцёрамі дома сумеснага самастойнага пражывання Цэнтра сацыяльнага абслугоўвання насельніцтва Дзятлаўскага раёна.

Пасля насычанага дня госці развіталіся з гезгальцамі: акрамя Дзятлаўшчыны, на маршруце атрада “Лёд і полымя” яшчэ Шчучынскі раён, на карце “Азімых” – Іўеўскі, Воранаўскі, Лідскі раёны. 

Ірына СТЫРНІК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga