Арандатары вадаёмаў – па-за ўвагай

Асноўнымі мэтамі экалагічнай палітыкі Рэспублікі Беларусь з’яўляюцца забеспячэнне экалагічна бяспечных умоваў для жыцця людзей, рацыянальнае выкарыстанне і ахова прыродных рэсурсаў, выпрацоўка прававых і эканамічных асноваў аховы навакольнага асяроддзя ў інтарэсах цяперашняга і будучых пакаленняў.

Аднак, як паказалі кантрольна-аналітычныя мерапрыемствы Лідскага міжраённага камітэта дзяржаўнага кантролю па пытанні выканання заканадаўства па ахове і выкарыстанні водных аб’ектаў і рыбных рэсурсаў, мясцовымі выканаўчымі і распарадчымі органамі не на належным узроўні арганізавана работа па ахове і выкарыстанні водных аб’ектаў і рыбных рэсурсаў.

Так, Астравецкім райвыканкамам не была арганізавана інвентарызацыя ўсіх водных аб’ектаў раёна з мэтай вызначэння рыбагаспадарчага прызначэння. Мерапрыемствы па ўзнаўленні рыбных рэсурсаў у фондзе запасу рыбалоўных угоддзяў на 2014-2016 гады не планаваліся і не праводзіліся.

У Воранаўскім раёне цяпер у арэндзе ў суб’ектаў гаспадарання знаходзяцца 24 водныя аб’екты, з арандатарамі Воранаўскім райвыканкамам заключаны дагаворы арэнды, у якіх устаноўлены пэўныя ўмовы прадастаўлення вадаёмаў. Аднак, Воранаўскім райвыканкамам не прызначаны асобы, адказныя за выкананне арандатарамі водных аб’ектаў умоваў заключаных дагавораў па поўнай і своечасовай выплаце імі арэнднай платы і выкананню планавага задання па вытворчасці рыбы.

Па выніках праведзеных кантрольна-аналітычных мерапрыемстваў райвыканкамам рэкамендавана прыняць меры па забеспячэнні своечасовай выплаты арандатарамі водных аб’ектаў арэнднай платы і няўстойкі за несвоечасова праведзеныя плацяжы, прызначыць асобаў, адказных за захаванне арандатарамі водных аб’ектаў умоваў заключаных дагавораў.

Н. КРЫВІЦКАЯ,
намеснік старшыні Камітэта дзяржаўнага кантролю Гродзенскай вобласці