Алена Абрамчык умее расказаць аб раёне і падарыць эмоцыі

21 лютага адзначаецца Сусветны дзень экскурсавода – прафесійнае свята экскурсаводаў і работнікаў сферы турызму.

Дата шырока адзначаецца ва ўсім свеце, у тым ліку ў Рэспубліцы Беларусь. Таму цікава было даведацца ў атэставанага экскурсавода нашага раёна, спецыяліста па турызме Дзятлаўскага турінфацэнтра, аўтара экскурсіі “Дарогамі Дзятлаўшчыны” Алены Абрамчык пра асаблівасці і адметнасці гэтай справы.

– Алена Рыгораўна, мы ведаем вас як настаўніка-філолага, які ўсё жыццё працаваў у школах горада, потым у гімназіі. Скажыце, як сталі экскурсаводам?

– Так жа неспадзявана, як і краязнаўцам: палюбіла гісторыю Дзятлаўшчыны, пачала яе даследаваць, і ўсё дзякуючы таму, што пайшла працаваць у Дзятлаўскі гісторыка-краязнаўчы музей. Работа мяне захапіла, бо там столькі цікавых матэрыялаў пра падзеі ў раёне, знакамітых людзей нашай зямлі. Даследавала, пісала артыкулы для дзятлаўчан, сустракалася з землякамі. Хацелася, каб пра Дзятлаўшчыну ведалі шырэй, асабліва самі яе ўраджэнцы і жыхары, каб ганарыліся сваёй зямлёй, разумелі, што яна лепшая. Пяцігадовая работа ў музеі дала магчымасць напісаць экскурсію “Дарогамі Дзятлаўшчыны” і абараніць яе ў Нацыянальным агенцтве па турызме.

– Напэўна, няпроста было зрабіць гэта адной, бо вядома, што такімі распрацоўкамі займаюцца калектывы навукоўцаў, выкладчыкаў вышэйшых навучальных установаў, і афармляюцца экскурсіі па ўсіх нормах навуковай працы.

– Лёгкіх шляхоў не бывае, але дарогу адольвае той, хто крок за крокам рухаецца наперад. Галоўнае – узяцца, а там ужо сорамна не скончыць. Перад сабой сорамна. Мой дэвіз па жыцці: людзі робяць – няўжо я не змагу. Галоўнае, мець цярпенне, матывацыю, вопыт. Мне дапамог вопыт трынаццацігадовай работы намеснікам дырэктара па вучэбна-метадычнай рабоце гімназіі № 1 горада Дзятлава.

– Якімі якасцямі павінен валодаць экскурсавод?

– У першую чаргу, выдатнай мовай, рускай і беларускай, таму што ў маёй практыцы былі турысты, якія прасілі весці экскурсію па-беларуску. Мне ў гэтым плане пашанцавала: у свой час скончыла філалагічны факультэт БДУ імя Леніна па спецыяльнасці “беларуская і руская мова і літаратура”, выкладала ў школах абедзве мовы, пішу на іх вершы, артыкулы, таму “язык лёгкі”, як кажуць у народзе.

Яшчэ экскурсавод павінен максімальна дасканала валодаць інфармацыяй, якую расказвае людзям, пры гэтым цікавіцца новымі даследаваннямі і выкарыстоўваць іх у экскурсіі. Ды і самому варта ўключацца ў размову як персанажу і чалавеку неабыякаваму, захопленаму, перадаваць уражанні, эмоцыі, нечым нават зачароўваць падарожніка. Возьмем, напрыклад, палац Радзівілаў у Дзятлаве. Будынак непрыглядны, але як пачнеш расказваць, як захопіш мінуўшчынай ды рознымі таямніцамі, то госць стаіць зачараваны, нібы бачыць перад сабой і Радзівілаў, і Пятра Першага, і Напалеона Орду з мальбертам каля возера.

– Дзятлаўскі турінфацэнтр і ўвесь наш раён сёння ведаюць далёка за яго межамі дзякуючы шматлікім тэле- і радыёперадачам, распрацавана шмат турыстычных праграм і маршрутаў, якія абапіраюцца ў тым ліку на ваш. Скажыце, якім бачыце турызм на Дзятлаўшчыне ў будучым?

– Спадзяюся, што знойдуцца  паслядоўнікі, і справа, якой аддадзена шмат сіл і энергіі, будзе прадаўжацца. Турыстычнай сферы жыць і развівацца – гэта мы ўсе разам паказалі на прыкладзе Дзятлаўшчыны, нягледзячы на адсутнасць у нас такіх знакамітых аб’ектаў, як Мірскі або Нясвіжскі замкі. Справа, відаць, не столькі ў колькасці гісторыка-культурных каштоўнасцяў, колькі ва ўменні прэзентаваць тое, што ёсць. І безумоўна, любіць трэба сваю работу, прафесію, сумленна і з добрым сэрцам адносіцца да працы, якая табе наканавана лёсам на пэўным этапе жыцця.

Ірына СТЫРНІК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#экскурсия #экскурсовод #Дятловщина