Акцыя ратаўнікоў працягваецца

У час рэспубліканскай акцыі “Канікулы без дыму і агню” работнікі Дзятлаўскага раённага аддзела па надзвычайных сітуацыях наведалі аздараўленчыя летнікі раёна. Ратаўнікі паказвалі дзецям тэматычнае відэа, праводзілі з імі прафілактычныя гутаркі, гульні, віктарыны, самыя актыўныя ўдзельнікі якіх атрымлівалі падарункі.
Сустрэлася з ратаўнікамі і першая змена рэспубліканскага летніка “Баравічок”.  Мерапрыемства пачалося з выступлення інспектара РАНС Аляксандра Беленкі. Ён прывёў статыстыку гібелі дзяцей на пажарах, расказаў аб прычынах трагедый, у ліку якіх ёсць і дзіцячае свавольства з агнём. Таксама Аляксандр Анатольевіч засяродзіў увагу хлопчыкаў і дзяўчынак на правілах паводзінаў на вадаёмах, аказання першай дапамогі чалавеку, які тоне.
Затым з дзецьмі была праведзена тэматычная гульня. Так, дзве каманды спаборнічалі ва ўменні без словаў растлумачыць адзін аднаму, што забаронена рабіць пры купанні на вадаёме.  Пераможцы былі ўзнагароджаны кнігай “Што рабіць, калі…” і наклейкамі.
Дапамагалі інспектару ў правядзенні акцыі актывісты моладзевай арганізацыі ратаўнікоў-пажарных сярэдняй школы №1 г. Дзятлава, у тым ліку ў вобразе роставых лялек Фількі і Лількі .
Захапленне і цікавасць у дзяцей выклікала дэманстрацыя тэхнічнага аснашчэння ратаўнікоў. Жадаючыя агледзелі кабіну пажарнага аўтамабіля “МАЗ”, цыстэрна якога змяшчае 5 тон вадкасці, паспрабавалі апрануць “баёўку” – спецвопратку ратаўнікоў, у якой яны працуюць пры ліквідацыі надзвычайных сітуацый. Самыя актыўныя хлопчыкі і дзяўчынкі “працавалі” з гідраінструментамі, а пасля прынялі ўдзел у конкурсе з выратавальнай вяроўкай. Завяршылася дэманстрацыя тэхнічнага аснашчэння падачай вады з лафетнага ствала.
Ратаўнікі плануюць правесці падобнае мерапрыемства ва ўсіх трох зменах летніка “Баравічок”.
І. КАМАРОВА