Ахова працы. Тэма, якая заўжды ў прыярытэце

5 жніўня пад кіраўніцтвам намесніка старшыні райвыканкама Вадзіма Бяляткі прайшло пасяджэнне камісіі па прафілактыцы вытворчага траўматызму і прафесійных захворванняў. Удзел у ім прымалі кіраўнікі і спецыялісты па ахове працы, ідэалагічныя работнікі ўстановаў і арганізацый нашага раёна, дзе ладзіліся прафсаюзныя маніторынгі і былі выяўлены недахопы, аб выпраўленні якіх яны далажылі.

З інфармацыяй аб выніках работы рэйдавай групы тэхнічнай інспекцыі працы Федэрацыі прафсаюзаў Беларусі ў Дзятлаўскім раёне прысутных азнаёміў галоўны спецыяліст упраўлення па працы, занятасці і сацыяльнай абароне райвыканкама Андрэй Лазута. Ён нагадаў, што група тэхінспекцыі працы ФПБ пабывала ў нашым раёне ў чэрвені. Былі праведзены маніторынгі з ажыццяўленнем грамадскага кантролю за захаваннем заканадаўства аб ахове працы і выкананнем калектыўнага дагавора ў шэрагу арганізацый, якія функцыянуюць на Дзятлаўшчыне, выяўлены некаторыя парушэнні. Абапіраючыся на інфармацыю Навагрудскага міжраённага аддзела Гродзенскага абласнога ўпраўлення Дэпартамента дзяржаўнай інспекцыі працы Міністэрства працы і сацыяльнай абароны Рэспублікі Беларусь, Андрэй Лазута прывёў статыстыку вытворчага траўматызму ў раёне і расказаў аб мерах, якія прымаліся па яго прафілактыцы ў другім квартале бягучага года.

Вынікі праверачнага мерапрыемства па захаванні патрабаванняў заканадаўства ў галіне санітарна-эпідэміялагічнага дабрабыту насельніцтва ў частцы ўмоваў працы, медыцынскага абслугоўвання, санітарна-бытавога забеспячэння і арганізацыі харчавання работнікаў аграпрамысловага комплексу пры правядзенні сельскагаспадарчых работ у ААТ “Дварэц-Агра” і КСУП “Жукоўшчына” падвяла галоўны доктар Дзятлаўскага райЦГЭ Алена Шайбак. 

Тэму дапоўнілі, нагадаўшы правілы бяспекі працы, якія нельга ігнараваць, старшыня раённай арганізацыі Беларускага прафсаюза работнікаў аграпрамысловага комплексу Уладзімір Казак, начальнік Дзятлаўскай раённай энергагазінспекцыі Вячаслаў Кець, намеснік начальніка Дзятлаўскага РАНС Сяргей Кухарчык, галоўны спецыяліст аддзела механізацыі ўпраўлення сельскай гаспадаркі і харчавання райвыканкама Аляксандр Камароў.

У ходзе жывой размовы ўдзельнікі пасяджэння абмеркавалі праблемныя моманты, на якія ў час маніторынгу звярталі ўвагу адказных спецыялістаў нашага раёна тэхнічныя інспектары працы ФПБ. Спыніліся на пытаннях прафілактычнай работы ў калектывах з асобамі схільнымі да ўжывання алкаголю. Было адзначана, што і ў далейшым факты выяўлення нецвярозых супрацоўнікаў на рабочых месцах будуць расцэньвацца, як недастаткова якасная работа адказных за гэты кірунак спецыялістаў.

Падводзячы вынікі сустрэчы, Вадзім Бялятка падкрэсліў, што ўсе недахопы, выяўленыя маніторынгавай групай, ужо выпраўлены. Ён зазначыў, што дробязяў у гэтай справе няма, і інжынеры па ахове працы павінны не толькі весці дакументацыю, але і знаходзіцца на вытворчасці, вучыць і накіроўваць работнікаў. Намеснік старшыні настроіў прысутных на адказную работу, акцэнтаваўшы ўвагу на тым, што пытанні аховы працы, вытворчай дысцыпліны і бяспекі заўжды будуць актуальныя, паколькі ад іх залежыць здароўе і жыццё людзей..

Ірына СТЫРНІК

Фота Вольгі ЮШКЕВІЧ

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga