Адкрываем новыя імёны вакалістаў і майстроў

Мікалай Райко,  Алеся Чурай,  Ала Чарняўская сталі фіналістамі раённага этапа рэспубліканскага  конкурсу «Новыя імёны Беларусі-2016». Сёлета ён праводзіўся  другі раз. Калі ў мінулым годзе да ўдзелу ў мерапрыемстве запрашаліся вакалісты, то сёлета конкурс дапоўніла і новая  намінацыя —«Дэкаратыўна-прыкладное мастацтва».

У гэтай намінацыі лепшымі прызнаны  Ірына Тарасевіч, Наталля  Дзем’янчык, Святлана Далжэнка.

Раённы этап конкурсу «Новыя імёны Беларусі» распачаўся з выступлення старшыні раённай арганізацыі прафсаюзаў Андрэя Сатарава. Ён павітаў удзельнікаў, засяродзіў увагу на ўмовах конкурсу, які, як адзначыў Андрэй Даміравіч, стане традыцыйным. Вынікам конкурсу стане гала-канцэрт фіналістаў мерапрыемства, і не толькі ў Мінску, але і ў па ўсёй Беларусі: у мінулым годзе артысты далі 60 канцэртаў.

Андрэй Даміравіч выказаў спадзяванне, што сёлета іх будзе не менш, і што ў ліку лепшых будуць дзятлаўчане.

Да прывітальных словаў старшыні раённай арганізацыі прафсаюзаў далучыўся намеснік старшыні Дзятлаўскага райвыканкама, старшыня журы Мікалай Мацюкевіч. Ён пажадаў удзельнікам добрага выступлення.

Па выніках намінацыі «Сцэнічнае майстэрства», удзел у якой прынялі больш за дзесяць выканаўцаў, фіналісты  — Ала Чарняўская, Мікалай Райко, Алеся Чурай былі адзначаны дыпломамі і памятнымі падарункамі — насценнымі гадзіннікамі з лагатыпам конкурсу. Заахвочвальны прыз атрымала  Таццяна Шостка.

Усе вакалісты атрымалі сертыфікат удзельніка, як і майстры дэкаратыўна-прыкладнога мастацтва.
Пераможцы раённага этапу конкурсу прадставяць Дзятлаўшчыну на абласным мерапрыемстве, якое пройдзе ў Гродне.

А. ДУБРОЎСКАЯ
Фота Н. АВЯРЧУК