Адказнасць перад законам – персанальная

У Наваельнянскім сельсавеце адбыўся сельскі сход, у якім узялі ўдзел прадстаўнікі раённай і мясцовай улады, кіраўнікі сілавых ведамстваў раёна, суб’екты прафілактыкі, мясцовыя жыхары. Мэта такіх мерапрыемстваў – папярэджанне надзвычайных сітуацыі (у тым ліку, пажараў), прафілактыка злачыннасці, недапушчэнне алкагалізацыі насельніцтва. Невыпадкова месцам правядзення першага ў гэтым годзе сходу быў абраны гарпасёлак Наваельня: у новым годзе тут адбыўся пажар з гібеллю чалавека.

Да пачатку мерапрыемства ўсе жадаючыя маглі набыць вогнетушыльнікі і пажарныя апавяшчальнікі, якія рэалізоўваў Дзятлаўскі ўчастак добраахвотнага пажарнага таварыства (на фотаздымку). Юныя ратаўнікі-пажарныя з Наваельнянскай сярэдняй школы правялі анкетаванне прысутных і раздалі прафілактычныя лістоўкі.

Пасля паказу дакументальнай стужкі “Цана імгнення” перад прысутнымі выступілі начальнік Дзятлаўскага раённага аддзела па надзвычайных сітуацыях У. Нячаеў, намеснік начальніка аддзела ўнутраных спраў Дзятлаўскага райвыканкама А. Зенаў, пракурор раёна саветнік юстыцыі В. Заяц, намеснік старшыні Дзятлаўскага райвыканкама М. Мацюкевіч, старшыня Наваельнянскага скльвыканкама І. Кунахавец. Таксама ў сельскім сходзе ўзялі ўдзел начальнік раённай інспекцыі энерганагляду В. Кець, намеснік дырэктара Дзятлаўскага раёна газазабеспячэння Ю. Ганчар. Выступоўцы прывялі статыстыку здарэнняў і правапарушэнняў мінулага года і засяродзілі ўвагу на тым, што за дапушчэнне парушэнняў закона кожны грамадзянін нясе персанальную адказнасць.

Згодна з рашэннем абласной камісіі па надзвычайных сітуацыях, аналагічныя сходы будуць ладзіцца штомесяц у сельскіх саветах раёна.

Н. СТУПЧЫК
Фота аўтара