ААТ “Граніт-Агра” – пераможца моладзевага турзлёту-2026

На галоўнай сцэне ўрочышча Рыбакі прайшла ўрачыстая цырымонія ўзнагароджання спартыўна-забаўляльнага марафона працоўнай моладзі Дзятлаўшчыны, які доўжыўся тры дні.

Павіншаваў усіх з Днём моладзі і завяршэннем мерапрыемства старшыня раённай арганізацыі Беларускага прафсаюза работнікаў аграпрамысловага комплексу Уладзімір Казак:

– Паважаныя сябры, віншую вас з паспяховым удзелам у турыстычным злёце і са святам моладзі. Жадаю новых ідэй, здзяйсненняў, планаў і поспехаў у працоўных, спартыўных, творчых справах.

Карыстаючыся нагодай, Уладзімір Фёдаравіч уручыў узнагароды адным з лепшых прадстаўнікоў творчай моладзі прадпрыемстваў аграпрамысловага комплексу раёна – Дзмітрыю Лабейку, Ірыне Слясарчык, Вераніцы Юруць, Надзеі Смокаць, Івану Палуянцэвічу.

– Мерапрыемства, як заўжды, атрымалася цікавым і вясёлым. На ўсіх пляцоўках у кожным з відаў праграмы была свая інтрыга. Усё гэта яшчэ надоўга застанецца ў вашай памяці. Прайграўшых сёння няма, выказваю словы ўдзячнасці і ўдзельнікам, і кіраўнікам прадпрыемстваў, якія падтрымлівалі свае каманды, – падвёў вынік загадчык сектара спорту райвыканкама Дзмітрый Ёда.

Лідары ў дзесяці турысцка-спартыўных відах спаборніцтваў размеркаваліся наступным чынам: быт турыста, падняцце гіры, сплаў на байдарках, турысцкая паласа перашкодаў – ААТ “Граніт-Агра”; турысцкая паласа перашкодаў – Дварэцкі льнозавод; баі гімнастычнымі шарамі, валейбол, гульня “Гарады” – КСУП “Хвінявічы”; перацягванне каната, мас-рэслінг – ТАА “Ізакам”; дартс – Новаяльнянскі КХП.

Чэмпіёнам моладзевага турысцкага злёту-2026, уладальнікам кубка і медалёў стала каманда ААТ “Граніт-Агра”, “серабро” – у ААТ “Новаяльнянскі камбінат хлебапрадуктаў”, “бронзавы” прызёр – КСУП “Хвінявічы”.

Каманда-пераможца прадставіць Дзятлаўшчыну на абласным турзлёце працоўнай моладзі.

Святлана ГРЫШЫНА

Наталля АВЯРЧУК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga