Вясной 2019 года на Дзятлаўшчыне пройдуць адкрытыя пасяджэнні аматарскіх аб’яднанняў “Нам гады не бяда” Цэнтра сацыяльнага абслугоўвання насельніцтва Дзятлаўскага раёна і “У коле сяброў” Дварэцкага дома культуры.
Менавіта два гэтыя клубы пры падтрымцы спецыялістаў сектара пазастацыянарнага абслугоўвання насельніцтва Дзятлаўскага раённага цэнтра культуры і народнай творчасці прымуць удзел у абласным конкурсе аматарскіх аб’яднанняў “Свет захапленняў”.
Так, наведвальнікі аб’яднання “Нам гады не бяда” прадставяць на абласным конкурсе творчую праграму “Мода трэцяга ўзросту”. Яна будзе ўключаць тры модныя дэфіле, у час якіх наведвальнікі клуба прадэманструюць калекцыю адзення, створанага ўласнымі рукамі. Сярод іх будуць рэчы і аксэсуары з джынсу.
Варта ўзгадаць, што летам 2018 года наведвальнікі аб’яднанняў “Нам гады не бяда” і “Праменьчык” падрыхтавалі да фестывалю “Славянскі базар” арыгінальную выставу “Джынсавая фантазія”. З Міжнароднага фестывалю творчасці інвалідаў “Віцебск-2018” дзятлаўчане вярнуліся з дыпломам першай ступені за дэкаратыўна-прыкладное мастацтва.
Будзем спадзявацца, што адкрытае пасяджэнне клуба выкліча не меншую цікавасць у абласных экспертаў, і творчы вопыт нашых землякоў дастойна ацэняць.
Ірына СТЫРНІК
