Багаты на шматгадовы вопыт і народныя традыцыі раённы сельскагаспадарчы кірмаш “Кірмаш гудзе – продаж ідзе!” размясціўся на цэнтральным базары раённага цэнтра і запрасіў за пакупкамі дбайных гаспадароў.
Ужо каторы год запар цэнтральны базар горада Дзятлава традыцыйна збірае кіраўнікоў і працаўнікоў раённых сельгасарганізацый, гаспадароў уласных аграсядзіб, прадстаўнікоў малога і сярэдняга бізнэсу, і пераўтвараецца ў гандлёвую пляцоўку, галоўным таварам якога з’яўляецца агародніна і садавіна. Становіцца відавочным, што з кожным прыездам раённыя сельгасарганізацыі аналізуюць, вывучаюць попыт пакупнікоў і тым самым штогод пашыраюць асартымент прадукцыі.
Вось і сёлета сельскагаспадарчыя, перапрацоўчыя, вытворчыя прадпрыемствы, фермеры з Дзятлаўскага і суседніх раёнаў прадставілі шырокі выбар сельгаспрадукцыі і прадуктаў уласнай вытворчасці: мясных і малочных, кулінарных і кандытарскіх вырабаў, насення і саджанцаў, хімічных угнаенняў і сельгасінвентару.
Пакупнікі ў сваю чаргу маглі набыць па даступных цэнах збожжа, бульбу, цыбулю, моркву, буракі, яблыкі, зерне, камбікорм, садова-агародны інвентар, пладова-ягадныя культуры, а таксама мясную і малочную прадукцыю.
Cа зніжкай можна было набыць як сельскагаспадарчую прадукцыю, так і прадукцыю вытворчых прадпрыемстваў.
Шырокі асартымент уласнай вытворчасці прапанаваў пакупнікам Дзятлаўскі сыраробны завод. У павільёнах райспажыўтаварыства і ААТ “Слонімскі мясакамбінат” жадаючыя набывалі мяса і мясапрадукты.
Прадукт уласнай вытворчасці па даступнай цане рэалізаваў Рагозніцкі крухмальны завод.
Выбіраць, як кажуць, было з чаго, таму кожны жадаючы мог зрабіць неабходныя запасы на зіму. Асаблівым попытам карысталіся бульба і капуста. У дастатковай колькасці было сталовых буракоў, морквы, цыбулі. Хутка разышліся пшаніца, ячмень, авёс. Акрамя таго, пакупнікоў цікавілі мёд, журавіны, арэхі, спецыі. Шмат у гэтым годзе было прадаўцоў пладовых саджанцаў, якія прапаноўвалі разнастайныя гатункі яблынь, груш, вішань, чарэшань, вінаграда і абрыкосаў.
На цэнтральных пляцоўках размясціліся рамеснікі, падворкі раённых сельгасарганізацый, народных майстроў, выставы-продажы.
На кірмашы можна было цікава правесці час, паслухаць добрую музыку, паглядзець на выступленні мясцовых артыстаў і калектываў з суседніх раёнаў. Работнікамі Дзятлаўскага раённага цэнтра культуры і народнай творчасці была падрыхтавана святочная тэатралізаваная праграма, канцэрт з удзелам лепшых самадзейных калектываў і выканаўцаў.
Яркае выступленне калектыву мастацкай самадзейнасці “Любчанка” з Навагрудскага раёна пераўтварыла гандлёвую пляцоўку культурна-масавага мерапрыемства ў песенны карагод.
Тэатралізаваная канцэртная праграма, а таксама конкурсы на лепшае сельскагаспадарчае падвор’е, аўкцыёны і розыгрышы радавалі наведвальнікаў кірмашу ў гэты восеньскі дзень.
Дзятлаўчане не толькі актыўна куплялі разнастайную прадукцыю сельскагаспадарчых, прамысловых і гандлёвых прадпрыемстваў, але і пабывалі на самабытна аформленых выставах-падворках, якія дапамаглі стварыць сапраўднае свята. Ветлівыя гаспадары запрашалі ўсіх у госці, частавалі смачнымі блінамі, сырам, духмянымі каўбасамі і іншымі прысмакамі. Да гучнай музыкі, жартоўных песень, вясёлых жартаў застацца абыякавым і прайсці міма было проста немагчыма.
У час кірмашу праходзіў конкурс “Чым багаты, тым і рады” сярод гандлёвых арганізацый і КСУПаў раёна. Улічвалася крэатыўнае і арыгінальнае афармленне сельскагаспадарчых падворкаў, страваў і тэатралізаваных выступленняў.
У намінацыі “Лепшае тэматычнае падвор’е” перамогу і дыплом першай ступені атрымалі калектыў работнікаў ААТ “Граніт-Агра”,
дыпломам другой ступені ўзнагароджаны калектыў работнікаў КСУП “Слава працы”, дыплом трэцяй ступені ў работнікаў КСУП “Войневічы”.
У намінацыі “Лепшая страва з яблыкаў” перамогу атрымала КСУП “Жукоўшчына”; у намінацыі “Лепшая гандлёвая кропка” – Дзятлаўскі філіял Гродзенскага аблспажыўтаварыства.
Віталі і ўзнагароджвалі пераможцаў старшыня Дзятлаўскага раённага Савета дэпутатаў Аляксандр Бараноўскі і старшыня Дзятлаўскага раённага камітэта прафсаюза работнікаў аграпрамысловага комплексу Уладзімір Казак.
Аксана АНДАЛЮКЕВІЧ
