Зрабіўшы свой выбар, людзі не спяшаліся пакідаць ўчасткі для галасавання. Тут можна было памераць артэрыяльны ціск, зайсці ў буфет і пабыць на канцэртах мясцовых выканаўцаў, паслухаць любімыя песні і музыку ў рамках праграмы “Калі мы адзіныя, то мы непераможныя!”.
Напрыклад, выбаршчыкаў Чырвонаармейскага ўчастка для галасавання №11 сваімі песнямі радавалі Таццяна Дудкіна, Наталля Маліноўская, Аляксандр Раеўскі.
Сярод першых гледачоў – Марына Навіцкая з трохгадовай дачкой Палінай. Цікаўлюся ў іх пра настрой.
– Настрой – вясёлы, святочны. Нам усё спадабалася, Паліна нават спрабавала вярнуцца ў кабінку для галасавання. Ёй было цікава пасля апускаць бюлетэні ў скрыню, хацелася зрабіць гэта яшчэ раз.
Дачка на выбарах не ўпершыню, брала яе з сабой яшчэ маленькай. Праўда, Паліне было цяжка растлумачыць, куды мы ідзём, і я сказала, што ў школу. Гэта яна разумее добра.
Мы ўжо пабылі ў буфеце, а цяпер атрымліваем задавальненне ад канцэрта.
Ірына СТЫРНІК
