У міні-футбол у Дзятлаве гуляюць многія, а перамагае – “Ніва”. Штатны фаварыт у чарговым адкрытым чэмпіянаце горада перамог за яўнаю перавагаю. Сярэбранага прызёра “Фарсаж” чэмпіён апярэдзіў на камфортныя 8 ачкоў, прайграў за 20 матчаў усяго адзін раз. І забіў больш за ўсіх галоў (76), і прапусціў менш за ўсіх мячоў (31). Ну чэмпіён, адным словам.
Дзятлаўскія “Фарсаж” і “БНГ” стараліся, па забітых мячах (па 74), лічы, параўняліся з “Ніваю”. Але абарончай саліднасці абедзвюм камандам не хапіла, каб усур’ёз замахнуцца на трон. “Фарсаж” спыніўся на сярэбранай прыступцы подыума, “БНГ” – на бронзавай.
Дзятлаўскае “Дынама” – чацвёртае пры роўнай колькасці ачкоў, па 33, з “БНГ”. Бронзавую перавагу “БНГ” абумовіў вынік асабістых сустрэч з “Дынама” – 3:1 (тры перамогі, адно паражэнне). Затое ў актыве “Дынама” адзіная на ўсіх удзельнікаў турніру перамога над чэмпіёнам (1:0). Дробязь, магчыма, але якая прыемная.
Пятым стаў навасёлкаўскі “Лібертас”. Гэта трагедыя. Дзяніс Трафімчык – капітан і ўвогуле ўсё, як аказалася, лібертасаўскае, атрымаў траўму, не змог выступаць у чэмпіянаце, і яго каманда пасыпалася, нават не змагла збірацца на матчы. Тут яшчэ раз пра роль асобы ў гісторыі.
З адным ачком фінішаваў у турніры “легіянер” дзятлаўскага чэмпіянату – навагрудскі “Фарт”. Адных спадзяванняў на фарт мала, каб хоць бы дабегчы да фінішу чатырохкругавога турніру. Другую палову чэмпіяната “Фарт” не адужаў.
Лепшыя бамбардзіры чэмпіянату – Алег Лазовік (“Фарсаж”, 18 мячоў), Арцём Літвінскі (“Лібертас”, 17 галоў), Уладзіслаў Нячай (“БНГ”, 15). Каманда Літвінскага, заўважце, удзельнічала толькі ў палове турніру.
За што змагаліся? За фізічнае здароўе, за жыццёвы тонус, у першую чаргу. Бонусам для чэмпіёнскай “Нівы” сталі кубак, грамата, залатыя медалі, тры неблагія мячы. Сярэбранаму прызёру “Фарсажу” дасталіся кубак, грамата, сярэбраныя медалі і два мячы. Бронзаваму “БНГ” – увесь названы камплект з бронзавым адлівам медалёў і адзін мяч.
Яшчэ адзін мяч у фінішны дзень чэмпіянату быў разыграны ў Топ-турніры чатырох лепшых. “Дынама” вельмі дарэчы ўзгадала свой подзвіг – адзіную ў чэмпіянаце перамогу над будучым чэмпіёнам – і яшчэ раз абыграла “Ніву” з лікам 2:1. Сярэбраны “Фарсаж”, паводле табелі аб рангах, пацвердзіў сваю перавагу над бронзавым “БНГ” – 4:3. “Дынама” ў той дзень лятала і ў фінальным матчы выдала большую магутнасць, чым “Фарсаж” – 3:1. Прызавы мяч – у “Дынама”.
Лепшымі па амплуа арганізатарамі турніру названы Аляксандр Пятроўскі (галкіпер, “Ніва”), Ігар Крагельскі (абаронца, “Фарсаж”), Алег Лазовік (форвард, “Фарсаж”) і Уладзіслаў Нячай (“БНГ”) – лепшым з усіх лепшых.
Б. ВАРНА
