Амаль палова насельніцтва планеты – 3,9 млрд чалавек – не мае доступу да інтэрнэту. Пра гэта гаворыцца ў новым дакладзе Міжнароднага саюза электрасувязі (МСЭ), прадстаўленым у Нью-Ёрку на Палітычным форуме высокага ўзроўню па ўстойлівым развіцці, паведамляе Цэнтр навін ААН.
Генеральны сакратар МСЭ Хоулинь Чжао заявіў, што неабходна зрабіць усё магчымае для падлучэння да Сусветнай павуціны усіх да аднаго жыхароў планеты.
Інфармацыйныя і камунікацыйныя тэхналогіі ляжаць у аснове цяперашняй эканомікі. Дзякуючы ім у людзей з’явілася больш магчымасцяў на вытворчасці, у сферы працаўладкавання, яны дапамагаюць людзям ажыццяўляць банкаўскія аперацыі, карыстацца шматлікімі паслугамі. Так, фермеры выкарыстоўваюць беспілотнікі і спадарожнікавыя здымкі для маніторынгу пасеваў. Медыкі і навукоўцы мабілізуюць штучны інтэлект для збору і аналізу інфармацыі, правядзення даследаванняў у сферы малекулярнай генетыкі.
Кіраўнік МСЭ заявіў, што назіраецца імклівае развіццё сеткі пятага пакалення (5G), якая здольная кардынальна змяніць жыццё чалавецтва да лепшага. Аўтары дакладу ўпэўненыя, што ІКТ неабходныя ва ўсіх трох асноўных сферах ўстойлівага развіцця: эканамічнага прагрэсу, сацыяльнай інтэграцыі і аховы навакольнага асяроддзя, паколькі ўзбройваюць людзей ведамі і адкрываюць новыя магчымасці.
