У час правядзення Адзінага дня інфармавання жыхар Дзятлаўскага раёна пацікавіўся, калі ў раённай паліклініцы ўстановяць спецыяльнае абсталяванне для счытвання ID-картак.
З пытаннем дапамог разабрацца начальнік аддзела ўнутраных спраў райвыканкама Вадзім Шчурскі:
– Пры пераходзе на ID-карткі ў Беларусі многія сутыкаюцца з шэрагам нязручнасцей, у першую чаргу, звязаных з адсутнасцю штампа аб рэгістрацыі (прапісцы) на пластыкавым носьбіце. Галоўная праблема для арганізацый і грамадзян – гэта недахоп счытвальнікаў. Арганізацыі, у якіх няма спецыяльнага абсталявання (карт-рыдэраў) або доступу да баз даных, не могуць хутка праверыць прапіску. У некаторых інстанцыях (банках ці паліклініках) патрабуюць пацвярджэнне рэгістрацыі, з-за чаго даводзіцца насіць з сабой папяровую даведку-выпіску. Каб атрымаць актуальную выпіску, грамадзянам неабходна звяртацца ў падраздзяленне па грамадзянстве і міграцыі або заказваць электронную паслугу на партале е-pаsluga.by.
Для паўнацэннага выкарыстання счытвальнікаў кожная медустанова павінна закупіць сертыфікаваныя ўстройствы, інтэграваць іх у адзіную дзяржаўную абароненую сістэму. Абсталяванне паліклінік і бальніц счытвальнікамі не адбываецца за адзін дзень – гэта частка дзяржаўнай праграмы па паўсюдным укараненні біяметрычных дакументаў. Абсталяванне закупляецца медустановамі ў рамках іх планавых бюджэтаў на інфарматызацыю. Канчатковыя тэрміны паўсюднага абсталявання паліклінік залежаць ад графікаў фінансавання цыфравізацыі аховы здароўя на месцах.
Укараненне счытвальнікаў для ID-картак у Дзятлаўскай ЦРБ напрамую прывязана да запуску Цэнтралізаванай інфармацыйнай сістэмы аховы здароўя. Паводле афіцыйнай інфармацыі адміністрацыі Дзятлаўскай ЦРБ, счытвальнік для ID-картак ужо набыты і ў бліжэйшы час будзе ўстаноўлены.
Святлана ГРЫШЫНА
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
